ccthewords
ccthewords

「喔!你也有在跑步啊!」

然後 0905

八月份,個頭開得幾好,每連跑三日就休息一日,休息完一日之後有好似差完電咁,又唔會連續每日去跑咁chur,其實幾鍾意呢個pattern。就去到生日個日,諗住點都要來個birthday run啦(順便可以攞埋個smashrun嘅badge),點知食完生日大餐覺得肚仔唔舒服,可能妹仔肚食唔慣好嘢啦,結果呢個birthday run睇泥都要下年再挑戰啦,哈。

係無乜藉口偷懶嘅情況下,偷懶咗四五日嘅呢段日子,睇咗歐陽靖寫嘅半自傳《歐陽靖寫給女生的跑步書》,幾欣賞佢嘅文筆,幾牽動人心,字裡行間完全感受到佢當期時嘅掙扎,亦都感受到一份真誠,真誠嘅文字真係好有感染力,唔知係因為佢嘅身世,定係因為馬拉松嘅微妙,講真,好少可純文字討論可以睇到我谷到眼淚。之後就search佢instagram睇下佢近況如何,而佢post stories就個日佢生咗BB,嘩,真係覺得有無咁蹺呀!希望佢同BB都健康快樂!然後同自己講,你呀,抖夠未呀,好去跑啦喎,人生啊。(0811)

之後都係連跑三日,不過就休息一個星期,無得WFH朝早早起唔到呀等等藉口當然大派用場,唯有放假先去放下電。上個月可以跑到150K,今個月睇住個trend如果跑到100K都算啦收貨啦,然後到月尾後三日只要每日跑到8-9K都可以達標,30號星期日跑唔到呀,咁31號星期一朝早起身跑埋佢啦。然後星期一朝頭慣例起唔到身,前一晚右腳又要痛喎,然後就同自己講,唉,月結都只不過係數字係浮雲啫,然後,就沒有然後了,哈哈。八月,92K。

七月vs八月月跑量(KM)

八月份都仲要戴住口罩跑,又熱又焗又曬嘅天氣,感覺到啲跑友都跑得好辛苦,唔知係咪錯覺,大家都好似平均地慢咗啲,然後就覺得大家好似被逼都要放慢來跑練下低心率,久而久之幾個月後就突飛猛進。本身三月份開始練低心率,到六七月好似有少少咁少少進步之際就俾個口罩亂入,推倒重來,砍掉重練,今次又唔知要經過多少春與秋之可以再見到曙光。今日直程係放棄治療mode,心率cadence披醒幾多K全部唔睇,總之我就超慢咁憑感覺跑,覺得透氣辛苦我就再慢啲甚至停低除罩抖咗兩三次,抖到我條氣順哂啦,先再繼續蟻躝。成日見到人地個啲跑步課表有interval又有咩easy run,我心諗我日日easy run都覺得好唔easy囉,然後我就繼續沉醉係我有我練嘅世界裡,覺得總之個日有跑到就點到叫做做咗啲嘢啦,之後就可以收工啦。

每日一跑,其實都想實現嘅,始終每日郁一郁,健康啲,又精神啲,做嘢又好似有幹勁啲,最重要係覺得起碼無白過個一日。而家無得wfh無得放工熄機趁未天黑就衝落街跑返轉,如果又唔想天黑黑咁跑,咁係得返返工前。回想有段(好短嘅)日子,實在可以六點鬧鐘、六點半落到街、七點半跑完返到屋企,個排都好早上床瞓覺,十點左右就想熄機,其實都係一個唔錯嘅cycle,要早起就會早睡,而早睡又可以早起。而又其實返工前嘅時間確實只屬於自己,唔會有其他人約你,又或者有其他嘢要做,係絕對自我自己嘅時間。而又如果想每日都可以有個固定時間去實現呢個行動,一係就揀呢段絕對自我嘅清晨時份,一係就放棄唔想天黑跑嘅原則囉。有日好晏先出去,出去時未日落,但on the way back嘅時候已經越來越黑,涼係的確涼爽好多,但周圍黑媽媽我要開啓夜視眼模式,可能只係唔慣,但我就真心唔鍾意要咁alert咁去跑步啦,仲要避開啲路人喎,如果有得揀,我都係揀天去囉,嗯,聽住先啦咁。

至於寫文,係與自己嘅對話。機會難得,但懶散得每月只花一次唔夠一個鐘嘅時間去面對自己,有啲愧對自己。唔跑、情緒無從發洩,唔寫、思緒只會越來越亂。寫下來,當清空腦袋,新嘅一日再來正念地面對吧。


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论