ccthewords
ccthewords

「喔!你也有在跑步啊!」

信仰 0707

估唔到變咗月記。

六月,炎炎夏日正式開始,經過五月嘅適應期,開始覺得溫度高都唔係咩一回事,同埋呢個月落多咗雨,多咗機會打水戰,仲有日三號風球跑見到彩虹添,感恩。

維持住晨早太陽未出哂來就開始跑、或者黃昏收梗啲太陽先出發,有日放假瞓醒八點先出發,嘩個太陽已經毒毒地高掛,咁樣曬成粒幾鐘堅辛苦,之後就算放假都6點起身,避得個太陽幾耐就當賺咗。

有個星期六晚計劃梗第二朝跑條新路線落葵方再返來,都係10K左右,但身邊那位不斷軟硬兼施話唔好啦,跑返平時個條正常路云云。原來都唔諗住理佢,但第二朝起身佢都係咁講,咁好啦,咪又係跑返去汀九橋囉,之後約係終點荃灣西食早餐。6點半出發,7點跑到入汀九橋,好少可咁早見到一班人已經係停車場個度聚埋一齊集合咁款,原來係周潤發OH MY DEAR!!!之後我就揼春無帶手提電話即係無相機啦,係no photo no talk嘅年代,無返張相,你講到你老豆係李嘉誠都無用啦。面皮厚厚咁照跑過去,講聲早晨發哥,「你想點呀」,我無帶相機呀,「咁點算呀」,我都唔知呀,「咁我都幫唔到你囉」,哎呀咁咁難得。之後發哥就同我手肘撞手肘一下,我就好失望咁跑走lu,咁真係無辦法嘛,鬼叫平時自己都懶瀟洒兩手揈揈就去跑咩,(其實我都係去晨運嘅一種啫)。跑走嘅時候見到有個師姐蠢蠢欲動咁,我再一次厚住面皮走過去問佢可唔可以借部相機影張合照,太好人啦。係咁say thank you,話轉頭先send返啲相俾我,我就係咁等求人當然唔好催人啦,師姐一得閒就send俾我,開心死,超興奮。然後即刻俾返credit身邊個位,好彩有聽佢講跑返平時條路咋,咪邊有咁好彩。興奮咗都差唔多一日,又神不守舍,仲搞到搭234B出荃灣市中心都唔記得落車要係西站行返過去添,頂。

另外又有個星期五,放工後自己時間,唔洗煮飯又無約人/無人約,即興計劃bucket list其中一個隱藏項目,由公司跑返屋企。都係決定跑平路唔上荔景山,貨櫃碼頭就貨櫃碼頭啦,唔洗跑出高速公路同馬路就OK架啦。著哂跑步衫係底,一放工除低條連身裙就跑得,唔帶手袋,有咩必須就放係腰袋到,或者星期一先返公司拎,帶枝水。睇天氣報告應該黃昏之後要落嘅雨都落哂啦,同埋呢排都七點半先開始天黑,六點出發,跑兩個鐘應該都唔會好難搵路卦。係公司準備跑嘅時候,唔知做乜驚咗一輪,好似臨去考試個種感覺咁。其實如果真係搵唔到路,咪搭車返屋企囉,同埋15K慢慢跑一定夠力跑嘅,行都行到返去啦,係咁安慰自己唔洗咁緊張。其實前一晚上完堂食咗甜水吹咗水夜晚差唔多成點先上床瞓其實唔係好夠精神,另外又唔知食錯咩可能飲咗黑糖珍珠鮮奶有啲搞肚又肚肚地痾,精神同身體嘅狀態都唔係非常好嘅情況下,有諗過擇日重賽,但又覺得一時衝動嘅嘢,呢一刻唔做,都唔知下一次會幾時先會再有衝動,哈,所以都係決定去馬!

渡船街、奧海城、大角咀、深旺道、南昌站蕩失路、興華街西、昂船洲。落狗屎,係咁問自己究竟我係度做梗啲乜,人又無個,貨櫃車都係疏疏落落咁,通常都係咁,跑到一半時就會極度懷疑人生。好啦一路睇住路線圖,一路精密計算我究竟洗唔洗過對面馬路,一路就遠望到美孚新邨、荔景山。

貨櫃碼頭南路、青葵公路、葵裕街、荃灣屠房、華人永遠墳場、永順街、海濱花園。終於見到如心,一路望住跑,心諗點解咁諗都未跑到嘅,到正正式式踏入荃灣公園個一刻,仲有2K就返到屋企,輕鬆哂,次次去到最後真係完成到都會沾沾,然後係咁同自己講 i did it i made it i really made it yeah * 1000

因為新路線嘅關係,要一路睇地圖一路睇有無行錯路,留意住身邊嘅人車風景,時間覺得好快,亦都唔會覺得乜要跑咁耐架,亦都因為係落雨天嘅關係,天唔係7點幾先黑,係未到7點都已經好L黑嘅情況下,你話無驚就假嘅,不過就好似Forrest Gump咁,有咩都係繼續跑囉,noting else can be done,(其實我仲未睇過呢套戲,哈),攰都攰,中途都行咗兩次飲下水搵下路。反而感激落咗場雨,如果唔係我都無咁快可以跑到返歸,只係RIP對白鞋,終於都要的起心肝洗啦。亦都因為無乜人跑嘅關係,得啲路人,基本上我都係逢人過人,都有少少沾沾,不過其實一向我都唔介意啲人過我爬我頭,有乜所謂啫,我都係自己練自己嘢啫。

跑一條新路線,仲要好似咁advance(危ない)嘅路線,絕對係激發人類小宇宙,完全係跳出comfort zone,你話有幾耐無去旅行去一個完全陌生嘅地方explore。已經有google map有哂規劃好嘅路線打哂底,都要付出幾大嘅勇氣(同一時衝動)去切切實實地執行。經過呢次之後,我發現自己原來仲係可以跳出comfort zone。原來,我仲可以。

勿忘初衷。一開始做運動絕對係因為想減肥想健康啲,一開始跑步絕對係跑3K都要半行半走唔想再跑,再到後來跑10K跑半馬再好高鶩遠咁跑得太快整親膝頭哥,到而家要跑步先可以舒緩到精神狀態,再由跑步去搵返自己。係呀,係瘦咗啲,又曬黑咗啲,視覺上都呃得下人,俾人讚瘦咗係開心,但如果你欣賞我呢份毅力,我會更開心。我諗減肥係bonus,雖然我依然好想要有嘅bonus,但跑步已經唔止係減肥嘅一個手段同工具,就好似人生嘅洗禮咁,係一種信仰,跑過,你就會信。

睇泥都係寫返週記好啲,如果唔係一次就會打太耐啦,太長氣架啦。6月,120K,繼續努力。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论