開始 0320

這週本來一開始的的雄心壯志，現正式宣布失敗。

就好似跑馬拉松咁，一開始就谷盡pace差唔多出盡全力跑，到後來一定唔夠氣仲跑得慢過平時，跑界術語稱之為跑爆。

啱啱過咗嘅星期日，「長課」10K，一方面為咗名古屋可以斬開四次以完成的線上跑馬拉松的第二課，另一方面因為週末比平日來啲時間可以奢侈地用上粒幾鐘去跑步、再用粒幾鐘去沖涼洗頭吹頭，再另一方面想試下一條係屋企附近嘅新路線，這麼近那麼遠。

大欖涌引水道，係港安醫院經元荃古道條梯上去大概150米高，再向汀九方向，來回都有成11K。就係咁自己一條友膽粗粗衝咗上去，開初時都會有路人閒人行過，亦都有好少量嘅跑友。綠油油一片，既陰涼又景觀開揚，重點係無乜人，唔會好似青山公路咁撞口撞面都係人，係咁要講唔該借借，又要單線雙程行車。但過咗汀九橋無耐個2-3K真係人影都無隻都咪話唔驚，雖則都光猛，但無人迎面而來的感覺係香港真係唔係幾慣。想維持targeted嘅低心率，但係長過5K嘅路程就越跑越慢。

星期日跑完就諗住星期一休息下，星期二再開始過，早起／跑／沖涼／整同食早餐／吹頭／出門口返工／放工／食飯／返屋企／溫一個鐘頭書／瞓／早起／，結果維持咗兩日，星期四就收咗皮，小腿又好緊，到星期五都未回復到。松浦彌太郎先生講得啱，你要維持你嘅日跑咩，就總有啲嘢要放棄，例如夜晚嘅聚餐，其他消遺，或多或少影響到身體狀況嘅活動。無他嘅，每人每日二十四小時，大家都係得咁多，就係睇你點砌自己嘅時間表而已，unlimited wants but limited time。可能係自己貪心，亦高估咗自己，安排多咗活動（例如返工放工時行多咗路去搭車），令休息時間少咗，休息唔夠，復原唔切，攰，惡性循環。睇嚟要再排過個時間表。

最慘係越跑越慢，同一低心率下，當然經驗之談都係話要兩至三個月先會漸見成效，但如果真係經過呢個訓練我turn out真係可以跑快啲，又可以唔好咁傷，又可以減肥（初衷！），我真心希望自己可以堅持落去，兩三個月啫又唔係兩三年，雖然夏天就殺到，但呢個時勢好似唔跑步都無乜其他特別嘢好做，哈哈。要著背心短褲咩，就要俾心機啦。