藉口 0531

一個字，懶！

當然懶人就特別多藉口嘅我覺得，例如要溫書考試啦、多嘢做咗啦、少咗work from home啦、天氣不似如期啦、成日唔係落豪雨行雷就係太陽太曬啦，無一個原因係因為自己懶架喎。

不過，的確跑得越來越慢，係近期最困擾我嘅一個重心。我唔肯定天氣越來越熱係咪最主要嘅原因，已經盡量揀朝早同太陽就落山去跑，無進步，仲好似一直退步梗，其實係我一直唔敢面對嘅事實。三月中開始嘅低心率，到而家五月尾其實都未夠三個月嘅，俾夠半年試用期，睇吓我嘅身體會唔會好啲嘅反應，同埋而家將最高心率由145推高到150，希望可以俾多啲少少空間俾自己。

你咪就當係去消脂囉，個半鐘頭出吓汗，係戶外環境騰跳吓，就算真係跑得慢，點都係訓練梗個心肺吖。

話說回來，辛辛苦苦跑完百幾K，轉個頭飲咗杯珍珠奶茶，又搞咗晚薯片tasting night(爭在未開啤酒)，今日又M到攰得濟五月最尾一日都無落街跑，然後同自己講，唔好勉強自己，同埋，間唔中一晚放肆下都OK嘅。結果，咪搞到好似下表咁囉，哈哈，咁的確上個月set到個target咁高都真係好難追嘅，上個月又咁多假期喎。難道要請annual leave清假去跑步，如果真係要行到呢一步，如果公司唔倒閉唔炒我，或者都可能係一件好事呢。

下個月，繼續努力！