步頻 0801

本身都慢慢跑返入8分pace內，但武漢肺炎疫情第三波每日都百幾人確診，就算touchwood唔驚自己染到都驚染到傳染屋企人，由年頭疫情開始咁耐都無戴過口罩跑（亦都無諗過戴住跑），到七月中終於出旺角去買咗個訓練面口罩，嘩，焗到呢，第一次戴住來跑，都唔敢跑太快唔敢跑太遠。其實本身已經都唔係快啦，戴住跑之前，六月份嘅時候，見咁熱，有放寬心率到150，而家戴住跑係根本快唔到，心率keep住到我應該要係嘅range到，所以都算係好事？哈！(0719)

唔好跑咁快，就唯有跑短啲，之前最低消費點都8K啦，上個星期有時6K都算數，其實可能係要趕返去食晚飯。不過WFH就真係跑多咗，係朝早起唔到身跑，但做完一日嘢，之後落一落街慢跑出身汗，reset一下，都幾好，如果唔係就好似有開工無放工嘅感覺。

有日一開始跑都未夠1K，掛住係度研究個口罩呼氣邊個位呼出泥，就(又)仆街了。其實跑步好少仆街，通常都係行山先仆，今次仲要左邊膝頭擦損流血，我又驚有菌唔敢用手用衫去抹，有少少驚魂未定咁繼續跑啦，只係皮外傷都唔會點影響到我跑步卦。結果流咗一陣有條細血痕就無繼續流，而我都繼續跑落去，一直諗好唔好去公廁洗下個傷口好呢，但諗起啲水可能仲唔乾淨，跑完返屋企先慢慢搞。結果都咪係又咁跑，跑6K就返歸啦。(0725)

咁不如又試下加高個cadence吖，神數字180SPM我當然只會視為target唔會逼死自己啦，提自己唔洗跑咁快，跑細步啲但密啲，仲將apple watch嘅display換一個做rolling spm，有時見到自己跑到17X SPM會沾沾嘅呢。亦都好明顯，如果個日cadence高，pace都相對快咗，咁與其叫自己辛苦啲谷行啲跑快啲，跑細步啲但密啲好似相對易啲，咁當然上斜明顯難啲啦。雖然呢個月真係好似重新泥過，但heartrate+cadence+熱天嘅配合，希望到冬天+除低口罩嘅一刻會見到（有顯著嘅）進步，少少進步都好吖。希望到個一刻會諗返轉頭感謝而家咁辛苦堅持嘅自己，然後又諗起個啲「你跑過的里數是不會背叛你的」嘅至理名言，然後就繼續落住雨慢慢跑返去lu。

七月，150K，我的身體，繼續多多指教。