朝夕 0516

五月中，熱辣辣，日照長咗，好處係可以晏少少去跑都未跑到入黑，唔好處就係就算一早起身去跑條路已經被曬到㷫烚烚。都好嘅，起碼六點起身時已經天光，唔會有天都未光唔願起身嘅感覺嘛。

上個星期m到要休息下，之後個幾日都有係屋企做下workout同拉下筋，想講兩粒星嘅workout仲攰過我平時超慢跑10K囉，可能郁到嘅肌肉比慢跑多，手手腳腳都堅攰。休息夠就繼續跑，見到個日曆多過3日停咗無跑，心理上同生理上都覺得唔知點咁，好想快啲去跑跑，哈。上星期四係放假，但係就掛住做功課趕deadline，諗住可以快手做完之後去跑返陣，半個鐘頭都好，結果都放棄咗，連少少workout都無做，嘥哂個假期。

有時覺得就算無去到跑，係屋企郁下都好過無。唔知稱唔稱得上係「喜」愛跑步，而家就算咁熱咁曬都好想出去跑返一頭半個鐘，本身初心可能係減肥，當然而家都係啦，另外又想再曬黑啲，白雪雪好顯肥，同時又想可以跑快啲，又想可以跑遠啲，最好就練習到身體可以跑到一個唔受傷嘅馬拉松。仲有仲有就係好想係呢段慢跑嘅時間，真真正正享受一個人嘅時間，唔洗social，唔洗同別人對話，唔洗睇人面色，唔洗講嘢，唔洗介懷別人有無在意自己，絕對係一個放空嘅私人時間，唔洗花錢，亦唔洗約人，不過係要約自己嘅。

係，雖然都係越跑越慢，要維持住大概145嘅心率，又熱又曬又無乜風嘅日子真係跌哂watt。好似有兩日跑跑下落雨，超爽！其實濕哂真係唔緊要，因為真係降到溫，今年都應該唔敢去泳池游水，咪就當落雨跑步係游水囉，當下水禮咗架啦。亦都解釋到幾年前有次跑10K比賽，一開波就傾盆大雨，然後結果PB咗(當然個PB成績對好多人講都不值一提啦，但其實我到而家都未快過個次)。跑得慢時，有時去到8分半甚至今日9分鐘pace嘅時候，對住自己真係擰哂頭，但下一秒就會同自己講我地唔係練梗速度，係練梗心率，慢慢跑，我而家要嘅係go far, 唔係go fast(住)，我想長跑長有，我想唔受傷咁跑好耐好遠，我真係想跑到跑唔郁個日為止。

成日同身邊人講，健康唔會一下子一朝一夕就可以得到，到我他朝有幸變老，年紀大機器壞嘅時候，我都唔知仲有無力氣個陣時先開始去保健自己嘅身體。如果我肯由而家就開始，每日每日做少少，強度唔洗好高，咁到老咗如果都真係身體好差，咁我無得怨吖，起碼我都做咗我可以做嘅嘢。其實我都只係自私唔想自己到時太過痛苦難受，唔想辛苦自己，更加唔想辛苦身邊嘅人。日積月累、滴水穿石、持之以恆、點石成金。