修行 0329

三月仲有三日就完，104公里，感覺一點一滴。

可能自小對數學科目比較有信心，自以為對數字比較敏感過人，其實就連最實用的外幣換算、或者更簡單的時區轉換，都係自身弱點。有一段時間亦覺得去理解什麼配速、心率區域、步頻等等等等實在同跑步健康太本末倒置，當然都因為那些公式以至背後的implication太難明白(同太難achieve到)，所以放棄理解、放棄量化自己，只求跑得郁。

後來還是選擇了去游水，其實都係鍾意游水多過跑步，如果可以一個人游哂成條lane的話。後來又的起心肝先軟後奏式報了名古屋馬拉松，再逼自己去正正式式上跑班學跑步，至少都執下啲姿勢同希望跑得快少少卦。

跟一班人一齊訓練的確係有用，有朋輩壓力，又有教練從旁鞭策，從來未試過跑得快過6分半鐘1K，對我來講真係milestone。每個週末又試下每次加2K咁「長課」來備戰42K，但可惜中途行山腳軟再傷過，不敢再輕舉妄動然後再想操返起咩，真係好難，要加倍努力都唔掂。

行山又驚再整傷，跑步又驚太激動，比賽迫在眉睫，其實好大壓力。同時又覺得好矛盾，明明想健康啲outdoor啲，反而因為個比賽而覺得有包袱，久久不能釋懷。到比賽真係取消咗，邊到都唔洗去嘅時候，我可能真係重新搵到跑步嘅樂趣。

修行，我幾鍾意呢兩個字。大部分時候都係一個人的，跑梗嘅時候有時會諗通啲嘢、諗起啲舊嘢、或者為咗要跑返慢啲同注意路面情況而諗唔到嘢。修行並唔係一朝一夕，要累積，要俾時間恆心，唔洗做好多好難，但每日都要做少少，就夠。

「聽起來都很簡單，但是簡單的事情一直做，做久了就很不簡單。」

漸漸覺得越有規律生活行動嘅人，越淡定有自信，越覺得佢地手到拿來處變不驚。一日24小時當中好清楚應該點樣揀去做啲乜同唔做啲乜which is做咗可能會影響其他本身重視嘅活動。我開始鍾意呢種規律。規律就慢慢變成一種習慣又好、儀式又好，身體同心理係會自動波就去做。就如星期五或六晚我可以靜靜坐低打下字，紀錄一下一啲諗法，梳理一下一啲情緒，呢個規律性的行為，某程度上又可以俾機會自己發洩一下好多好多嘅思緒、情緒、心結，亦都可以將一啲好想講出來但未必即時搵到啱講啱聽的人去表達，而我又好鍾意讀返自己寫嘅文，所以我可以講俾自己聽，說來幸運。

「『當你早上梳洗完畢以後，必須仔細地給星球梳洗，必須規定自己按時去拔掉猴麵包樹苗。這種樹苗小的時候與玫瑰苗差不多，一旦可以把它們區別開的時時候，就要把它拔掉。這是一件非常乏味的工作，但很容易。』」《小王子》

之後每次跑完都可以將消耗咗嘅體力同意志量化成數字同圖表，我希望睇到自己有進步，哪怕只係因為天氣涼咗所以好似跑快咗，就算跑慢咗我都欣賞自己有去跑，keep得到。雖然仲係好多籍口，又落雨又M到，每次跑嘅強度唔大，就係希望長跑長有。「令你停下來的唔係距離，而係速度。」「想跑得快，先要跑得慢。」睇泥跑者都會係哲學家，出太多大道理。或者其實只係一堆口水佬，哈。