廣東話碎碎念專用頻道

廣東話保存站/澳門式粵語/生活雜談

又嚟一年一度嘅「新學習計劃」

發布於
早排一個fd問我:結他要自學難唔難?
我話:要睇佢嘅目標係咩喎

到咗2020(空白)嘅最後一日,估計又要被年度總結同新年新希望嘅Post包圍。講真,你睇下周圍嘅人,有幾多個成功減到肥?;) 不過一年又難得先果一次,倒不如好好享受下呢個「年度盛典」啦。

鑒於今年嘅我過嘅係一片空白,唯有著重講下年後先發生嘅「新年新計劃」。早年我都好似啲夢想家咁,列咗啲「100 things to do」喺我嘅年計劃入面,然而宜家睇翻,我真係希望我可以嘥少啲時間喺異想天開嘅幻想度。

目標要達成,原嚟都有理論

有睇過《3的法則》或聽過呢個理論嘅人大概知道目標唔可以太多,然後再分成各個步驟去完成果件事。雖然唔一定要「3」呢個數字,但要達成一件事,真係需要極度嘅專注。關於習慣養成、自我成長、學習,我推薦下面幾本暢銷書:

  1. 《刻意練習》
  2. 《原子習慣》
  3. 《專注力》

每本書都有一定厚度,然而歸納出嚟嘅要點基本就果幾項,如果無耐性睇完建議可以去YouTube睇說書人嘅介紹。嗯,係強烈建議,因為我都覺得睇曬成本好沉悶(笑)。YouTuber方面我比較推艾爾文、啾啾鞋、囧星人。(YouTuber要揀專業說書人而唔係網紅 ;))

因為呢幾本都係世界級暢銷書,我就唔多講佢啲內容嚟掗字數啦。其實呢幾本書(當然仲有其他好書)佢哋有啲概念係共通嘅,以下用一啲我生活上會遇到實例嚟解釋,首先係文章一開頭提到嘅:

結他自學難唔難?

鑒於好多人睇少結他呢樣樂器,針對呢個問題,首先要問翻佢嘅係:你想學到咩程度?或者話,你嘅目標係咩?

最近都遇到啲想學嚟求婚嘅、或者婚禮上彈唱嘅,咁我可以講:(你要達成呢個目標)結他唔難,自學都唔難。搵一首Chord好易彈嘅流行曲、或者改編到好易按嘅Chord,再用好BB班嘅掃法Run一次,唔洗一個月出得場。(畢竟最重要嘅係心意 ;))

關於自學呢回事,以樂器嚟講,有一個好老師係事半功倍嘅。早幾個月第一次認真上1對1歌唱班,果幾個月嘅時間真係比喺YouTube自己學快好多倍。然後,老師最重要嘅功能之一係:回饋。關於呢點《刻意練習》都有提到,有回饋先知自己邊度需要改進、加強,而唔係一直練自己熟練嘅地方。雖然咁講,作為一個教師兼學習者,儘管有拜師,最重要嘅係課堂外嘅你有幾努力。

你一個星期花幾多時間喺呢件事上?

最近問過一個學外語嘅fd呢個問題,佢話得閒果陣會攊出嚟睇2、3次,OT果陣就好懶;都問過另一個學樂器嘅人,佢話一星期一次吧。

唔,首先我要講明嘅係,可能睇我上面書單就已經知,我呢篇指嘅係「認真」嘅學習,想「盡全力達成一個或數個目標」嘅學習。唔係新鮮感玩玩下,亦都唔係求完婚就呢世都唔再掂部結他。係刻意練習

我都利申下先,雖然我彈咗好多年結他,但都並唔係一直都咁認真:中學一開始掂,因為都得閒,可以一日彈3個鐘;大學同工作後會分心,特別拍拖果陣完全無掂過咁濟;最近得閒翻同有目標,大概維持到一星期5日。5日多唔多?以學樂器嚟講真係唔多,但呢個係一個基本要維持嘅數,如果稱為認真。當然,仲要搭配埋《刻意練習》嘅其他要素,比如話精準嘅練習方向,呢度就唔著墨了。

「語言要出國學」嘅迷思

呢個議題分成兩個點:

  1. 出咗國果班人外語能力有好幾多?
  2. 呃,我真係無錢出國喎,係咪無解?

關於第一點,我諗大學果陣大家都有略有聽聞,有啲人去到英美澳加後係普通話變好咗 ;),抑或係日本住咗幾年連M記都唔識哎(真人真事)。我唔係否定出國唔係一個學語言嘅好方法,而係,呢個真係唔係一個必然結果。我哋點樣學母語?就係細個果陣週邊嘅人成日咁同你講,你唔洗背生字、記文法就自然而然講到好流利。而由於好多學外語嘅人都一把年紀了(?),用同樣方法,掉你去外國就真係可以學好?我真係好懷疑。

會學好嘅人無論佢喺邊度都會學好

……呢句唔小心落咗小小心靈雞湯。順應去到第二點,其實出唔出國好,我哋可以「自製」一個外語環境。上面講過,有老師令你學習事半功倍,而最重要嘅係你花幾多時間喺件事上面。比如英文,假設你唔係翻外資,你一個星期有幾日會掂到英文?創造英文環境,我目前係咁做:

  • 將所有網站同Apps嘅語言設定改成英文
  • 改用英文睇平時會睇嘅嘢:YouTube, Google, Wikipedia, etc.
  • 字典由英漢改用成英英
  • 睇外國人教嘅全英教學或全英教材
  • 其實我應該改由英文寫文……

之類。

其實我以前學日文都係用呢種模式,手機同各個網站一直係set咗日文、直接睇日網嚟留意音樂嘅最新資訊,果段時間嘅日文讀解能力真係直線上升。最重要最重要係,你要睇感興趣嘅嘢,因為咁,你先會堅持落去。

因為平時都有教開日文,以常規班嚟講教咗一年,《大家的日本語》先教到17、18課,究竟幾年先學識啊……而平時考高分嘅學生都唔一定係日文能力較高果群,課堂外花幾多時間接觸同鑽研,先係影響嘅因素。如果同學生講,叫佢哋一個星期要睇5次日文,唔知會唔會濕我呢(笑)。

學習好緩慢,但又好似有進展咁

近排心血來潮開始認真咁執翻起英文,用翻一啲學習上嘅技巧,再不斷微調適合自己嘅模式;時而作為學生、時而作為老師,有時都會思考點樣可以將學習成果最大化。然後,我睇翻今年年頭寫過嘅果份英文CV,我可以感受到我呢個外語嘅進步了 :)

比起充滿幹勁嘅年度計劃,堅持並有計劃咁進行更為重要。人無辦法同時專注喺過多嘅事上(至少我係),希望下年嘅呢個時候,我最在意嘅果幾件事,可以睇出正穩步成長。

2

看不過癮?

一鍵登入,即可加入全球最優質中文創作社區