運動教曉我

所謂一山還有一山高，天外有天，你就算全隊最好，全國最好，總有人比你更加好。即使你今日已經全球最好，下一個月、下一年又如何？人總會老，被後浪取代。所以運動場上，勝負再重要，都未及突破自己重要。與其沉迷同人鬥，其實你只需要同自己鬥。上屆世界盃準決賽，巴西輸（德國）七比一，因為自己打得差；今屆巴拿馬第一次打入世界盃決賽周，已經一大突破，能夠射入世界盃第一球，又再有進一步突破。運動場教識我好多好多：當年打香港隊，十場有九場輸，何必浪費時間精力？因為你去到外地比賽，對手遠比香港比賽對手強，只有對手比自己強，先可以迫到自己突破本身水平，認識自己原來可以做得有幾好，而認識自己極限，認識自己，永遠都最有意思。電影《一代宗師》有句對白：「見自己 見天地 見眾生」，運動場上，正正可以做到。