尋日去炒散搬貨，我執咗隻黑貓返屋企 (1)

有咩慘得過中年失業？

我係程滿月，一睇我個名就知我係月圓之夜出世，可惜我唔係咩人狼，我只係一個一事無成嘅麻甩佬。

本身我做開車房嘅，但半年前間車房摺咗之後，我就一直都搵唔到工；我細個讀書唔叻，冇咩學歷可言，加上人到中年，大半世人都係做車房，雖然我成日安慰自己都算係專業人士，但搵唔到長工就係搵唔到。我唔係冇去啲車房問過，但人哋個個都齊晒班，無啦啦點會請多個？

不過好在我老友阿強有個勁朵－－炒散王，佢成日有工就搵埋我齊齊做，我呢個老粗主要都係做搬搬抬抬咁，老實講我幾鍾意做倉務，又有錢收又可以順手練大隻。

講真啦，其實我都真係幾科，對胸肌成塊牛扒咁，手臂就黑黑實實有舊老鼠仔；不過可能衰冇錢，又唔多鍾意講嘢，所以一直都係孤家寡人；但阿強唔係咁睇，佢話我係就係幾科，但最慘係點都搣唔甩個中年發福大肚腩，所以啲女睇我唔上眼喎！

之但係我都唔抱咩希望架啦，我份人一向都唔係叻嗰啲，讀書唔叻、做嘢唔叻，啲人話「天生我材必有用」，我就覺得「天生我材冇撚用」！本來我就係打算咁樣得過且過，過得一日得一日就算架啦，直至尋日……

尋日我又去觀塘炒散搬貨，搬到我身水身汗之際，無啦啦有啲聲喺倉嘅一個暗角傳出嚟……

「喂，阿強，你聽唔聽到嗰邊有啲聲？」我問。

「好似係有啲嘢郁到啲雜物咁。」阿強答我時，角落傳嚟「沙沙」聲。

「係唔係老鼠呀？」阿強冇理我，繼續努力搬貨。

唔知點解，我好似被角落頭啲聲吸引住咁，我放低啲貨行咗過去。

行到埋去，又冇晒聲，正當我想行開，突然有個黑影好快咁撲過嚟！

「嘩！」我成個人嚇到向後跌低咗，同時感覺到塊臉有啲濕濕地嘅嘢。

「喵！喵！」原來係隻黑貓！佢重成隻狗咁好熱情咁舔我塊面。

「搞乜呀你？」阿強見我跌低，行咗過嚟睇：「嘩，正喎喂！今晚燉咗佢嚟食。」

我攬住隻貓坐咗起身，望望隻嘢又幾得意，我就啤住阿強：「食你個頭呀！隻嘢咁痴我，我拎佢返屋企養。」

「阿滿，黑貓好邪架！」

隻貓舔緊我隻手，一啲邪氣都冇，我就話：「係邪都邪住你啦，見到貓就想食！」

就係咁，做完嘢我就抱咗隻黑貓返歸。返到去我擺低佢，鎖好門窗諗住去沖涼，點知隻貓突然跑去我面前，喺廁所門口坐低咗。

「貓哥，我要沖涼呀！一陣先同你玩。」我提起右腳想跨過佢。

呢個時候，我突然聽到把聲：「我有名，同埋我係女仔。」

我停低咗喺半空隻腳，望住隻貓，佢又望住我；「一定係我聽錯。」我自言自語。

但係同一把聲否定咗我：「你冇聽錯，我同你講嘢呀！」

我擘大個口望佢，望咗三秒，之後鳩叫咗出嚟：「嘩！你咩料？喃嘸阿彌陀佛！我們在天上的父！」同時成個人彈開咗九丈遠。

「你唔使咁驚，我冇惡意！」佢一路講一路用隻貓爪抓自己個額頭，呢個時候我先發現，原來佢額頭有塊污漕到同佢啲貓毛一樣咁黑嘅膠布，佢抓咗幾下，個塊膠布甩咗，額頭就出現咗個黃色月亮圖案。

「嘩！包青天呀！」我忍唔住叫出嚟。

「你就包青天，我係露罅！」

「露罅？露咩罅？」我認我心邪。

「露娜呀！死變態！」佢搖咗搖個頭，好不屑咁望住我。

「Ok，露娜姐，我同你無怨無仇，你唔好搞我！我而家開門畀你走啦！」我對隻貓低聲下氣咁講。

「唉！」佢嘆咗一口氣，行前咗兩步抬高頭望住我，而我就垂低頭望住佢。突然，佢額頭個月亮有條光柱射咗出嚟，直射到我額頭！然後恐怖嘅事就發生咗……

我突然成身啲衫冇晒！冇錯，係全裸！

我啲手腳開始自己郁，右腳無啦啦伸直又舉高，高到塊面旁邊（媽呀！我係唔係甩咗臼？），然後我隻手無啦啦有把剃鬚刀，一嘢就手起刀落剃晒啲腳毛！剃完右腳擺低，我成個上身繼而彎到向下摺埋咗，心口對膝頭咁，再唔自主咁剃埋左面嘅腳毛！

我想叫，但叫唔出！我只知自己對腳變得好－－白－－滑－－！

突然我個上身又fing返上嚟，今次輪到條腰向後彎！同時我又用優美嘅姿勢剃埋兩隻手同格肋底啲毛（爸呀！我唔要變冇毛豬呀）！

Fing完一輪又跳咗陣絲帶舞，最後終於企返好，但我瞄下個地先發現，原來我係凌空咗！

我重未驚完，個心口中間就無啦啦爆咗個紅色蝴蝶結出嚟，對手又多咗對白色手套，對腳就著住紅色長靴；然後扭下個蘿袖，嘩！我著住件水手服，條裙重短到只係遮得住個蘿袖！

「咳咳！」露娜咳咗兩聲望住我。

我慢慢半空落返嚟企穩，佢好恭敬咁叫我：「公主殿下。」

「What？公主？」我大聲狂叫咗出嚟。

露娜點咗下頭：「你前世係月光公主，轉世嚟咗地球，我經過幾十年終於揾到你，以後就靠你維護世界和平啦！」

講真我真係O晒嘴，我都未來得切反應，露娜跑去窗前，同我講：「你而家試下向個山出招啦！」

「出招？」我一路問一路著住對長靴，好唔習慣咁八字腳行去窗前。

佢望住我講：「舉起你枝新月棒指住目標，大叫：『月光昇華洗禮』！」

「撚有咩新月棒呀？」我問完望望手上把剃鬚刀，WTF！點解變咗枝新月棒嘅？

「試下啦！」露娜佢唔多耐煩望住我。

我舉起枝棒，指住遠處冇人嘅山頭，大叫：「月光昇華洗禮！」

同時，碌棒射出咗一個光球，直飛去山頭度，然後……然後個光球消失咗，座山就喺中間穿咗個大咕窿！冇錯！中間有個大咕窿，我可以望穿座山望到對面啲樓呀！

「嘩！強呀！」見到自己有咁強嘅能力，我開心到跳起，完全唔記得自己著住迷你裙會走光。

露娜行過嚟，一臉認真望住我：「公主殿下，你要好好守護地球呀！」

「係！」我大聲回應，就係咁，由今日起，我正式成為咗一個有用嘅人。

在香港做創作很難，但我還是選擇了這條路，希望大家可以在下方為我按讚，這將成為我的動力和經濟上的支持。