薯仔
薯仔

拾荒者

給梅姐的信

梅姐,

唔係你嘅忠粉,但係你嘅歌總交織係我成長嘅某啲片段。 入場睇你嘅故事,既係悼念你,亦係悼念逝去嘅我所熟悉的香港。

電影冇乜故事性,平鋪咁講你由新秀攞獎到癌症逝世, 即使著意講你同劉培基同哥哥 Leslie 嘅友情,其實都好表面化。 偏偏我又好似好多港人咁,忍唔住流出眼淚, 你嘅故仔反映咗香港嗰個騰飛嘅年代。

你讀書唔多,但係你好努力咁學習唔同語文嘅歌曲。嗰幕你以新人代替盛名嘅 Johnny Ip 落夜總會唱,知道觀眾好鼓躁,你問咗侍應有乜客人,然後唱咗廣東歌、國語歌同日本歌。我覺得好香港,冇乜資源,但眼光睇準世界。

故仔有講你姐姐,但係冇講到梅媽媽同埋你阿哥,或者係有避忌,有點可惜,否則更能反映你嘅性格與擔當。

當然更多人批評消失咗嘅六四、民主歌聲獻中華同埋何韻詩,其實咁又突出咗香港依家嘅荒謬。 冇人敢肯定你若在生會支持雨傘、支持反送中,但我信你會支持年輕人!

你同 Leslie 都係2003年走,嗰年真係香港嘅一個大轉折。經歷 SARS,然後五十萬人上街反23條,老懵董下台好似話畀我哋聽上街有用、爭取民主自由有望,但嗰年開始又係更多香港人眼光只係睇住北水,然後歷史由香港人華東振災、到國內辦學,扭曲為大陸幫香港人對抗疫症、振興經濟。

依家香港人活係武肺陰影下,百萬人上街只換嚟宇宙無敵大法,機場晚晚上演生離死别,我哋似乎只能懷緬你活著嘅年代。

唔想太灰,學余英時咁,但願香港人去到邊,邊度就係香港,香港精神不死!梅姐你永遠係香港人嘅女兒,又係香港精神嘅象徵。

一個電影觀眾



CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论