潮乜春
潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

疫情退散後,不如去台灣來一場台九線之旅

如果你問我有咩地方我真係好想係疫情之後可以去,我會答係台灣嘅東部。

作為一個宅,理應係去日本朝聖或者睇唔同嘅演唱會,台灣可能間唔中都可以有機會有日本藝人過去表演,但係台灣東部就乜都無;唔好話睇表演,甚至乎連宅人會去購物嘅地方,例如Animate(安美利特)等等一間都無,咁點解要揀台灣嘅東部?

台灣東部,即係泛指宜蘭、花蓮同台東等地方,唔單止遠離台北,而且要前往嘅方法都唔係咁方便,咁點解我仲要揀?我指嘅其實係由台北貫通台灣東部去到墾丁嘅台九線,其實亦都係因為呢一條道路所以我先至咁想去。可能你會覺得好奇怪,但係其實我唔知點解行過一次之後,對台灣嘅台九線就比佢深深吸引着,雖然之前兩次台灣環島之旅雖然都只可以好快咁樣經過,但係已經對我留下好深刻嘅印象。

上兩次去台灣環島遊嘅時候,台九線改善工程都只係開咗蘇澳-東澳段一小段,但仍然無損沿途嘅景色。正所謂:人生苦短,需及時行樂,去旅行是為了休息,之後可以行更遠嘅路,但如果想欣賞台九線沿途嘅景色,最直接嘅方法係自己揸車。雖然好多人可能覺得自駕遊係好麻煩同埋好辛苦,但係呢個先至係我享受嘅方法。揸住架車,慢慢欣賞大自然對抗人類嘅鬼斧神工,果種感覺如果唔係親身經歷過其實真係好難明白,因為沿途的景色完全唔可以用文字黎都形容。

正如我之前咁講,台九線貫穿咁多地方,而我每次只係走馬看花咁樣經過,所以如果今次計劃真係可以成行,我應該會花大約五日時間係台九線唔同嘅地方,由南向北咁樣行,享受每個地方唔同嘅風土人情同湖江山色。可能沿途會遇到嘅住宿可能只係好簡陋,但係為咗要享受嗰個地方,可能越簡陋可能會越好,越能夠體驗當地人情;另一方面,我追求嘅唔係要享受五星級嘅生活,而係我好想同當地人有交流,因為想了解每一個地方文化,最直接就係同當地人交流,如果下下享受五星級酒店就一定無機會可以交流到。記得之前兩次環島遊,兩次都係宜蘭揀咗唔同嘅民宿,兩次同民宿主人都有好多交流,呢個真係一個最直接最好嘅方法去了解當地嘅文化。

咁當然,作為一個鍾意揸車嘅人,除咗沿途欣賞風景之外,更加想去行下(定係應該講揸車經過?)工程過後嘅台九線,即係大家熟悉嘅蘇花改南迴改。對好多人來講可能只係台九線其中一部份嘅道路,但對我來講唔知點解有種好奇妙嘅感覺。由開始工程一刻開始,我就開始有留意關於呢啲改善工程嘅新聞,明明我係生活係香港,但係唔知點解唯獨對呢條路咁有興趣。人類對抗大自然有好多例子,例如日本明石海峽大橋和瑞士聖哥達公路隧,但當我一路睇台九線改建嘅新聞,就發現人定勝天其實都唔一定,如果大家有睇過唔同嘅新聞,就會發現呢條公路改善工程無一部份係容易興建,因為好容易受到地震、颱風同暴雨嘅威脅,所以興建時間比其他同類工程長同辛苦,俗啲咁講真係有血有肉咁樣興建。可能亦都正正因為咁樣,我真係好想再揸車行多一次,除咗可以再次欣賞到大自然同人類對抗之外,亦都希望係某程度上感謝工程人員嘅付出。

最後當然係希望呢一場疫情可以盡快完結,俾我呢個旅程可以有機會開始計劃同實行。

P.S. 如果有興趣歡迎按此觀看我之前環島旅程嘅紀錄

P.P.S. 希望大家可以按五下拍手,作為支持我創作的原動力(土下座

P.P.P.S. 希望有機會係不久嘅將來可以再寫篇/系列遊記,向大家分享我的另類體驗之旅~

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论