潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

為什麼會選擇做AV?

甚麼是AV?當初又是為甚麼走去做AV?
我是華麗的馬賽克

好啦首先真係要講聲唔好意思,如果你係因為標題吸引你入來的,我真係感到萬分抱歉。因為我今日要講嘅,絕對唔係日本嘅成人影片產業,而係想講同大家生活息息相關但係肯定唔係大部份人都認識嘅一個工程:影音工程,Audio and Video,下稱:AV工程。

其實我相信一定好多人會問,究竟AV唔係等如IT咩?理論上係無錯,因為的而且確現今嘅影音工程絕大部份都需要依靠網絡傳送,甚至乎需要採用俾一般正常網絡使用更高規格嘅器材運作,但是嚴格上來講其實係兩樣唔同的工程。IT 工程主要負責連接對外的網絡和各種伺服器、內聯網的等等倚靠網絡連接運作的網絡;AV 工程主要係負責例如閉路電視 CCTV、投影機、電子看板等等唔同嘅產物,但只會將影像傳送到控制室,基本上唔會傳送至其他地方。如果係以前嘅時代,AV工程最主要就係用大家細細個一定成日接觸到嘅三色線黎都傳送信號,依家雖然科技發達,大部份都已經改用 LAN 線或者 Wi-Fi,但有部份儀器仍然使用傳統嘅傳輸方式,例如三色線或者特定格式嘅線材,所以即使現今科技一日千里,但AV工程仍然處於剛剛進行更新的階段。

其實大家如果有睇過之前《Happy Birthday to Me》,就會知道我係讀書時期因為實習關係被安排到一間影音工程公司工作。因為費事俾人秋後算帳,所以公司名同負責嘅工程項目就唔能夠公開,不過我相信就算唔公開都唔會影響大家嘅閱讀觀感。其實當初我去面試嘅時候,只係一個好基本嘅面試,甚至乎見面時候完全無提及工作內容,只係好基本約見,我記得只是詢問了我一些基本的個人資料和有沒有車牌就完結了整個面試,之後誤打誤撞之下就竟然順利進入了這間公司。第一日返工嘅時候,我以為真係做IT類型嘅實習,畢竟我都係就讀 IT 相關學科。但係意想不到的是,第一個星期竟然是叫我在看 AutoCAD 圖則和熟讀各項產品,但是我記得在第一天中午過後,我便逐漸發現我閱讀的所有材料都是偏向影音方面而不是 IT 方面,所以便知道接下來的日子應該會很辛苦。

我仲好記得第二個星期第一日返工,我就收到一條車匙(作為我餘下日子嘅接駁工具)同一疊圖則,之後就是開始我的地獄生活。朝早首先是去巡視各個地盤,當時的公司位於金鐘,然後負責的工地在南區和北角,當然揸車果個就係我。巡視完各個地盤,了解當時實際嘅情況之後,下午便是和業主開會。雖然我只是剛剛接手,但是因為已經看了一星期的資料,所以在第一次開會的時候仍然可以對答如流,而不同人士提出的修改亦都順利明白,等待我的就只有回辦公室更改圖則的部份。咁你一定會問,點解會由我呢個新人負責兩個工地?咁我上司呢?好遺憾,因為香城負責影音工程的公司實在太少,係我接手之後,佢負責的工程項目一下子由十個大幅削減變成八個,所以都算幫佢減輕了負擔。

其實大家對於影音工程嘅認識,可能往往只係以為係好傳統嘅產品,例如DVD機、電視等等。放心,我係未接觸之前,我都係以為AV只係一啲好傳統嘅工程,結果原來係正如我上面咁講,連投影機安裝和閉路電視等等都是編入AV工程而不是IT工程,其實真係有少少令我出乎意料。不過係香城來講,AV工程在每一個工地都屬於令人嫌棄的部門。相比起任何一個工序,AV工程往往都係最後一個進入工地的部門,相比起其他任何一個部門,AV工程能夠工作嘅時間只有完成室內建設到整棟大廈完工前的一刻,平均只有三個月至半年時間。但是往往因為是最後一個部門才加入,所以通常是在一年前才開始進行招標程序。時間少或者都未是最大問題,因為安裝可以請多幾個人解決,但係最大問題係圖則上嘅問題。因為建築時候嘅問題,例如有橫樑需要更改室內設計、土地問題原先預計房間的面積縮細等等,會根據當時情況而作出更改,但是,因為我們主要是向顧問公司索取圖則,但基於工程尚未完成,顧問公司手持嘅圖則未必是最新和已經通知業主的版本,所以我們收到圖則嘅時候,往往會因為有唔同嘅更改而我們未能夠及時得知,所以導致唔同嘅產品在圖則上的設計位置和實際安裝有困難。而且因為是和實際建築的圖則有所不同,所以如果發現有唔同,更加需要我們自己親自落手更改,絕對是一項浪費時間的工作,因為在更改圖則後,我們需要重新與顧問公司核對,而且也要再三研究產品新的擺放位置,如果真係不幸需要改位,在工地現場改位是少,需要重新訂購合適的產品先至係最大問題。雖然我實習嘅時候只係一個普通嘅實習生,但是因為公司人手緊絕,所以由採購到安裝我都有所涉獵。而且最大的問題是,如果不幸因為尺寸大細不符合而需要更改產品,除了因為需要和顧問開會互相拉鋸之外,而且也要與供應商商討採購事宜。但遺憾嘅係,即使香城是一個十分先進和發達的城市,但是絕大部份AV工程的產品香城都沒有代理,往往需要直接與外國廠商聯繫,而且往往更加因為時間問題需要選擇最昂貴和最快的速遞方式,所以導致浪費在這些程序的時間數以星期計。

全部也是信號轉換器

果陣時我主要負責一間學校同酒店嘅AV工程,兩者面對嘅挑戰完全截然不同,所以基本上好難偷雞。先講學校那一個工程先,令人意想不到竟然是原來是在我入職前一星期才決定由我加入的公司負責,所以到入職的時候,完完全全就變成了由我負責。雖然作為一個新丁,任何事也是白紙一張,但是畢竟我的上司是在江湖打滾了許多年的老前輩,所以經過一星期的蹂躪之後,我亦都逐漸了解自己當刻的感覺是多麼的無助。因為只有半年時限,和我的實習時期是一模一樣,如果稍有差池,我應該便不能順利畢業了,所以老實說也很緊張。其實我當初剛剛接手嘅時候,只有兩個字可以形容:惡劣。工地嘅環境雖然十分惡劣,並不是一般人能夠接受,但是我為了畢業,什麼也要做。幸好,我進入工地的時候大部份室內裝修已經完成,所以不用面對沙塵滾滾的環境。但是,由於現時的建築物設計絕對不是我們這些凡夫俗子能夠了解的,所以設計成很奇怪的形狀,而且正如我上面所述,我拿到的圖則不是最新的,所以更改圖則和再一次尋找合適的零件便是最重要的事情。AutoCAD老實說,如果只是使用,2D平面圖方面,AutoCAD絕對不是一套太困難的軟件,我大約兩、三天左右便大約掌握了絕大部份技巧,所以我大約花了三星期左右便完成更改了所有圖則。對於大部份人來說,係一個現有嘅圖則下進行更改,用三個星期會唔會太耐?係,無錯,三星期的而且確是花了太長時間,但是負責工程的顧問公司出名是全行最挑剔的公司,一些唔關事雞毛蒜皮的事,例如洗手間的大細、樓梯梯級數目等等也會作出挑剔,所以導致到花了這麼多時間進行更改。之後即使成圖則的更改,但是下一個問題便是採購的產品與名單上的不符合。唔係因為金錢問題而將貨就價,而係因為大部份產品是在整個建築工程剛剛開始時便選擇,經過了數年的建設,大部份產品不是停售便是已經推陳出新,但是當時顧問公司給予我的回覆竟然是先盡可能找名單上一模一樣型號的產品,如果找不到才申請更改成最新型號的產品。這個無限的輪迴過程大約又花了一個月時間,顧問公司才勉強接納全部的產品。

好記得果陣時,IoT物聯網剛剛興起,業主便要求盡可能將所有產品改為可以使用IoT方式連接,例如投影機與投影機專用的電動螢幕、班房燈光控制、唔同課室閉路電視的即時影像控制等等,所以又要再一次係名單上面作出更改。雖然今次相對上需要更改的產品只有數項,但是即使當時對於我這個是讀IT的學生而言,IoT絕對是我一個從未接觸過的領域,都知道我們有需要花上額外的金錢重金禮聘數名日本的專家來香港協助我們編寫程式。原本只是要求使用輕觸式控制面板控制所有儀器,但在編寫一星期後業主便表示希望可以改為使用手機應用程式控制,方便使用,所以我們便需要重新設計程式。雖然軟件方面我完全唔需要負責設計,但是硬件方面卻要親自落手。安裝投影機和螢幕、安裝閉路電視和拉線、安裝電子樓層看版、安裝專用路由器和設定、機箱嘅安裝(52U)等等,因為實際第一件產品送達工地安裝的時候,距離工程完結的日子只餘下三個月,而且需要在暑假前落成並啟用,所以時間所限,完全不容許延遲交貨,所以亦都導致我要展開一段非人嘅生活。當然,每一天我在辦公室工作的時候,工地上仍然有工人協助安裝,但是畢竟人手有限,而且部份房間會鎖上,需要額外花時間尋找保安人員解鎖和安裝完後重新鎖上房間,導致每天的生產力嚴重不足。果陣時因為趕工,每日均有三批工人進行安裝工作,全天候廿四小時不眠不休進行。幸好在落成交貨前一天,剛剛好趕上進度,成為整個工程最後一個完成安裝和啟用的項目。雖然依家睇返轉頭,都仲係覺得好辛苦,但係經歷咗咁多風風雨雨之後見到成品出來果一刻,那種心情我唔識得用文字表達,真係好開心自己竟然有機會由頭到尾負責一個工程項目。

鋪設中的機箱櫃(封面圖解碼版)

另一個我負責嘅地方就係一間五星級酒店的AV工程,相比起學校建設,雖然沒有令人麻煩的顧問,而且圖則也是順利拿到最新的版本,加上整個AV工程有接近一年的時間,我接手的時候已經過了半年,相對上比較舒服,而且時間亦都比較充足,可以花比較少時間在這一個項目上面。相比起我另一個負責的項目,這一間五星級酒店的工程絕對是在人手比較充足的情況下接手。相比起只有八層的學校,這一間五星級酒店樓高接近六十層,相對上要採購或者工作的項目亦都比較多,而且因為發展商政策影響,這一個工程在夜晚六點後到翌日早上八時不能工作,所以相對上我不能在這一邊通宵達旦工作。雖然我沒有繪畫圖則的煩惱,而且就算需要作出更改,只要跟負責畫圖則的公司商討,他便會幫我們更改,絕對是省時方便。但是,不知道是不是負責畫圖則的人在起初是不是蓋了什麼藥,每一層圖則的比例也可以完全不同。需要明白,有建築工人到於辦公室負責採購的同事,可能都唔知道安裝嘅實際位置,往往都需要靠圖則協助。在工地負責安裝的工人,可以根據現場環境和放大的圖則大約判斷實際安裝位置,但是這一間五星級酒店的圖則絕對可以使用糟糕來形容。舉例來說,一間酒店二十到五十樓的樓層也是一模一樣的客房,理論上只要copy and paste,重複三十次,然後更改圖則名稱和所屬樓層便可以完成;但是,這一個天才卻每一層也是採用不同的比例繪畫,令到我閱讀嘅時候我需要特別留意比例。係一棟咁高嘅大廈,基於訊號傳遞嘅弱點,每隔一段距離便需要擺放放大器以加強訊號,所以我們大約每十層便需要額外設立機房擺放儀器。相比起另一個學校工程,這一間五星級酒店為了美觀,室內的設計需要經過特別思考,所以為了美觀,在部份樓層們需要和其他部門共用機房。但是有一次因為我忘記了看比例,預訂了一個比較闊的機箱櫃,導致到完全擺唔到入去,解決方法當然是馬上預訂另一個新的機箱櫃。但是經過抽絲剝繭了解成因之後,才發現這個比例的問題,雖然可以話係我粗心大意沒有留意比例,但可以調返轉咁講,有邊個天才會將每一層嘅比例都設計成不唔同,要重新計算。

如果當時我實習後繼續留在該公司工作,我下一個會負責的項目便是香城迪士尼樂園城堡的重建計劃,雖然最後好彩我離開了,但是亦都可以講少少。相比起上述兩項AV工程,迪士尼樂園的工程相對上要求比較多。要求多多也不問題,最大的問題是要求所有材料均要透過迪士尼訂購,唔可以我們用公司名義自行訂購,除了不便之外更加係不便,一方面預訂所需嘅時間我們難以掌握,難以安排工人到場安裝;另一方面是因為有部份供應商不會向非該類工程公司販售貨品,導致很多的不便。而且當時聽我同事說,最大的問題是希望可以在城堡落成的同一天完成所有工程。這裏的落成不是指完成所有工序然後交貨,而是指在城堡仍然在灌石屎的時候便開始進行AV工程,除了難度大增以外,更加需要同唔同嘅部門配合,所以迪士尼嘅工程往往都係廿四小時工作,絕對比起其他工程更加複雜,更加多嘅問題需要解決。但係好彩,係接手之前我亦都因為實習時限已到,順利離開了呢間公司。雖然我上司曾經有詢問我可不可以留下來幫忙,話我是一個很有才華的學生,應該可以順利在AV工程發展,但是畢竟我對AV工程興趣不大,所以便放棄了這個工作機會。

睇到呢度,你可能會問:既然都係同IT用差唔多嘅產物同線材,點解唔借IT地方擺放AV產品?係,的確,在部分很細地方,IT和AV是會放在附近甚至共用機箱櫃和由IT工程人員兼鋪設AV工程。但是,如果有咁上下規模大細,雙方面難以共用,而且近年開始,大部分閉路電視CCTV改為以LAN線作為信號傳輸和供電,不再需要依賴火牛。雖然LAN線供應的電力有限,但是仍然會產生發熱問題。如果將一大束接駁閉路電視的LAN線捆綁在一起,絕對有機會過熱着火,加上需要唔同嘅走線迎合不同的設計,所以難以與其他部門公用地方。曾經有人講過,AV工程係工地入邊唯一一個最唔受歡迎嘅工程項目,因為往往都是最後一個才進場,而且因為其他部門都需要遷就我們而進行唔同嘅更改,輕則更改走線位置,重則需要將部份牆拆除重建;而且相對上,絕大部份嘅產品都比其他產品體積為大,除咗在工地內運輸比較困難外,安裝時和安裝後需要保護的範圍亦都比較大,所以好多人都會對我們有好多唔友善嘅方式對待,例如使用升降機要提前一星期預約,但是其他人沒有這種要求、工地的辦公室往往安排在最偏遠的地方等等。其實我絕對明白,因為要將已經整好嘅地方重新再整多次,絕對係浪費體力又耗時,但是好多時都係因為最初嘅設計根本沒有預留給予AV工程的地方,所以才會有這種情況出現。但是偏偏每一項工程,小則一幢住宅大廈,大則一棟高樓大廈,AV工程比起IT工程更加重要,但是人們總是只記得預留給IT工程位置而沒有預留AV工程的位置,所以導致經常要去唔同地方偷地方出來用,所以令人討厭也是無可厚非。如果你當初係比我個標題呃咗入來的話,再一次講聲唔好意思,亦都好多謝你由頭睇到尾。今日就講到呢度先,下星期六再見。

Like my work??
Don't forget to support or like, so I know you are with me..

CC BY-NC-ND 2.0
4

Want to read more ?

Login with one click and join the most diverse creator community.