潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

應該如何選擇適合我的備份?

大部份人影完相之後都會因為回憶而唔想刪除佢,所以久而久之每個人電話或者電腦入邊總會越來越多相片?雖然每一張相嘅大細都不是太大,但係總有一天會把所有容量塞滿,所以為求方便,相信好多人都會選擇放係唔同地方供將來有需要時再作回味。但係市場上嘅備份有咁多種,甚至乎更有可以放係自己屋企嘅NAS,我應該點樣選擇一個適合自己嘅備份方法?

對於大部份人來講,影完相即刻放上Twitter、Facebook 、Instagram、Whatsapp 等等唔同嘅社交媒體同其他人分享絕對係好平常嘅事。之後亦都有唔少人會覺得因為已經放咗上社交媒體,所以原本果張相片已經可以係手機或者相機入邊刪除,有需要時再係唔同社交媒體下載返落黎。呢個諗法絕對係一個好多人都覺得好合理嘅方法,但係其實有好多人唔知道嘅係,相片放上唔同社交媒體之後,會經過唔同嘅壓縮處理,除咗為咗加快載入速度之外,更加係因為每一分每一秒都有大量嘅用家在上傳照片,如果唔進行適當嘅壓縮,那怕係10000000TB的硬碟也會有塞滿的一天。當然壓縮嘅前提就係唔影響畫質嘅情況之下,但係曾經有研究報告指出,每一次上載到社交媒體然後再下載回來的相片,會比剛剛拍攝時損失最少20%的像素,雖然一般人睇唔到任何分別,但係如果你需要再進行後期編輯、睇返拍攝時所有嘅數據(如果上載到社交媒體然後再下載回來的相片所有數據也是會被清除的)、或者只係單單想重新回味嘅時候,你都係會有少少發現同啱啱影出黎嘅相片有啲唔同。咁所以有好多人即使上到到社交媒體之後都仍然會儲存係手機或者記憶咭或者電腦入邊。

除非你係一個有錢人,你將全部相片都放入一部有12個HHD嘅電腦中,而且每一個電腦硬碟都係12TB,咁我真係無野好講。如果你真係嘅,咁就麻煩你自己撳上一頁離開,因為之後嘅內容就絕對唔啱你睇。

咁我相信留低嘅絕大部份人都唔係會咁癲嘅人,咁所以究竟係有限嘅空間之下,係唔剷除任何相片,亦都唔想壓縮,想盡量原汁原味保留所有相片嘅細節情況之下,有啲咩合適嘅選擇?不如就等我同大家分析下唔同嘅選擇。咁當然,大部份我都有親身試用過,但係未必適合每一個人,最終都係要睇返你實際用途而決定邊一個方案最適合自己。

開始之前比大家一個參考數據。目前手機所影嘅相片主流嘅格式係:HEIC>PNG>JPG;而相機就係:TIFF>PNG>JPG。左邊嘅檔案格式雖然檔案大細比較大,但係保留嘅像素和細節比較仔細,對於後期編輯絕對較為方便,;而左邊嘅檔案大細雖然比較細,但係為咗方便,只會保留重要細節,雖然不至於對相片有影響,但如果要後期透過 Photoshop 等等軟件進行修改,像素欠佳問題亦都比較容易凸顯出來。

自組NAS

呢一個相比起之後要介紹嘅任何一個選擇,都會顯得特別貴。但係正所謂一分錢一分貨,呢個絕對係最安全嘅選擇。自組NAS,顧名思義,就係直接放一部伺服器係屋企。目前市面上嘅選擇其實主要都係得幾大牌子,而且全部都唔包括硬碟,需要另外購買,所以粗略計算最便宜入手也需要接近$3500HKD/$12000TWD。

但係呢一個咁貴嘅方案,相比其他,安全性上面絕對無人能及。因為直接放係自己屋企,所有用戶必須透過特定網址和使用者名稱密碼才可以存取,唔使擔心會因為中毒而資料外洩。而且因為所有資料亦都存放係自己屋企,唔使驚服務宗旨或者違反服務協議已取消嘅風險。更加重要嘅係,上傳同下載資料嘅檔案大細完全唔受限制,一整段一小時完整4K影片上載下載亦都無問題。不過凡事都有兩面,缺點就係傳統機械硬碟運作時會發出聲音,如果放在房間容易被噪音影響,而且風扇高速運轉線嘅噪音亦都好好大聲。而且市場上99%嘅NAS係唔可以透過Wi-Fi連接,必須使用LAN線,簡單來講就係盡可能放近路由器位置,所以可能對大部份人來講都係有些不便。

另外選擇嘅時候亦都請選擇最少兩隻硬碟以上嘅NAS,因為近幾年即使係這些伺服器專用的硬碟,亦都經常出現唔同嘅災情,所以為咗保障資料多一重安全,所以請購買最少兩個插槽的NAS。而且相比起一個插槽的NAS,可以提供更佳嘅效能,甚至乎設立屬於自己嘅 Minecraft伺服器、WordPress網站都唔係問題。市場上絕大部份正在販售嘅兩插槽NAS都最少已經配備1GB RAM,而且可以根據自己需要增加,相比起只有一個插槽嘅NAS,擴充性絕對比較大。選購嘅時候亦都盡可能選擇適用於伺服器嘅硬碟,因為呢一類嘅硬碟比較適合24小時長時間讀取,有更高嘅耐用性。另外兩隻硬碟嘅大細和型號最好是一模一樣,避免出錯。另外近幾年M2 SSD雖然已經成為組裝電腦必須嘅設備,而近年亦都開始逐漸出現使用M2 SSD的NAS,但係始終晶片嘅特性,加上目前技術尚未成熟,所以目前除咗價格仍然超高昂之外,資料存取嘅穩定性同埋安全亦都係一個考慮。所以除非技術有所突破,否則我相信使用M2 SSD嘅NAS難以取代使用傳統機器硬碟嘅NAS。

⭕️ 安全可靠,所有資料儲存在自己屋企
❌ 成本高昂,長遠要考慮電費增幅
SD卡/USB 手指

相比起自組NAS,相信另一個最多人會考慮儲存嘅方法就係將所有資料放去SD卡/USB 手指。呢個其實亦都算係一個比較平嘅解決方法。老實講,依家SD卡/USB 手指 128/256GB,甚至乎1-2TB容量嘅價錢都已經接近最抵價,相信大家都總會有一兩件傍身。

雖然呢個係一個好方便嘅選擇,但係相對上亦都係一個好危險嘅方法。首先可能會遺失SD卡/USB 手指,即使用唔同嘅加密方法加密內容,但係以現時破解嘅威力,只要有心嘅情況之下其實無嘢係做唔到;另一方面就係如果有好多SD卡/USB 手指,要搵返資料出嚟其實都唔係一件容易嘅事。但係始終價錢都真係好平,所以仍然受到大眾嘅歡迎。

不過選購嘅時候真係最好選擇一啲比較出名嘅牌子,如果唔係真係得不償失。我以前試過因為貪平而選擇購買128GB SONY的SDXC記憶卡,但用了半年後便壞了,所以如果真係要選擇SD卡/USB 手指當儲存時候,盡可能選擇有保障嘅牌子。另外亦都要留意讀寫速度,現時普遍大部份都係U1 U2 U3 為入門標準,如果標示係Class 系列的速度,我相信你會覺得好痛苦,因為果種讀寫速度就猶豫56K上網一樣。

⭕️ 價格平,方便
❌ 容易遺失,有洩露資料風險
便攜式硬碟

相比起選擇SD卡/USB 手指,目前市面上另一個比較多人選擇嘅方法就係便攜式硬碟。雖然體積比SD卡/USB 手指大好多,但係比傳統NAS節省好多位置,而且唔需要額外供電,插在電腦USB就可以即插即用,絕對係居家旅行方便之選。疫情之前我去旅行嘅時候都會帶一隻便攜式硬碟去旅行,方便晚上在酒店寫張相片移入硬碟中。

既然呢個相比起NAS方便,而且最平大約$500HKD/$1800TWD左右就已經有交易,而且最少也有1TB容量嘅硬碟選擇,咁點解一直都無其他咁多人選擇同普及?其實應該咁樣講,雖然係方便,但係因為中間需要經過多一條線接駁電腦同硬碟,往往受制於USB速度限制,而且如果選擇USB-C連接的線材需要額外購買,價格分分鐘已經要半隻便攜式硬碟的價錢,所以在速度受限制前提之下絕對比NAS同SD卡/USB 手指略輸一籌。另外, 便攜式硬碟還有一個天生的缺點就係因為入邊主要係採用類似電腦HDD嘅磁碟,如果有碰撞或者跌落地下好容易導致磁碟碎裂或壞軌情況,即使大部份廠商都會附送防撞外殼,但係畢竟作用有限,所以耐用性相比SD卡/USB 手指再輸多一層。(SD卡/USB 手指主要是採用晶片儲存,即使外殼嚴重受損,只要沒有傷及晶片,仍然可以讀取;磁碟如果受損或者碎裂,即使成功修復但對讀取資料也有影響,最多只可以讀取大約80%左右的資料)

⭕️ 方便攜帶,可以插在電腦、電視任何有USB嘅地方都可以使用
❌ 意外後好容易影響讀取,而且修復價錢昂貴
Google Drive

Google Drive相信大家都唔會陌生,除咗純粹儲存相片之外,更加係各式各樣嘅檔案文件影片都可以上傳。唯一缺點就係得15GB係免費,之後如果想增加容量就需要付款解鎖。

對於大部份企業來講,Google Drive絕對係佢哋嘅首選,除咗係因為街知巷聞之外,亦都係因為穩定性出名而多人選擇(雖然近幾年經常出現斷線情況),但係其實對於個人來講就好尷尬。雖然15GB對大部份人來講都好足夠,但係佢當中係包括文件、試算表、相片、電郵等等,所以如果你除咗Google Drive之外仲有用Gmail,而且長期唔會定期刪除email,相對上Google Drive可以用嘅空間會逐漸減少。

另外雖然係方便,但係如果大家睇一睇個收費表,就會發現如果想增加容量,價錢一啲都唔平,而且可以選擇嘅方案少之又少。如果大家依稀記得,以前Google Photo可以上載圖片而不受容量限制,但係因為近幾年實在太多人使用呢個功能儲存相片,所以亦都取消咗呢個無限制嘅儲存,即使使用Goole親生仔Pixel,最多都只可以享用100GB嘅相片儲存,相對上性價比絕對馬上消失,所以Google Drive我反而建議係存取一啲檔案會適合多個存取相片或者影片,畢竟我覺得儲存相片有其他地方被Google Drive好。

⭕️ 街知巷聞,方便,服務多元化
❌ 如果需要升級價錢昂貴,而且取消無限制免費存放相片
iCloud +

iCloud +應該就係咁多種方案入邊最實惠嘅方案,每個月$8HKD/$30TWD就有交易。而且最少也有50GB的容量,更加可以同屋企人分享,絕對係大件夾抵食。

我要重新一次先,我要講嘅係iCloud +而唔係iCloud。最大分別係iCloud +要收費,iCloud係免費。免費嘅iCloud只提供5GB容量;而即使選擇最便宜嘅iCloud +都有50 GB。對於大部份人來講,其實50GB已經足夠。咁當然,如果要同屋企人分享買大一些容量絕對係更加適合。

不過我個人覺得唔係每一個人都適合。首先,如果你係使用Android手機嘅人,雖然都可以讀取內容,但就無使用iOS系統咁方便。另外就係如果你只係得部iPhone或者只有一樣使用蘋果系統的裝置,iCloud +相對上略為失色。依家全新iPhone 13都已經128 GB起跳,絕大部份用家都未必會用盡所有容量,所以如果只有一樣蘋果系列嘅裝置,iCloud +絕對顯得有點多餘。但係如果你係好似我咁,Apple全家桶,Mac Mini、MacBook Pro、iPhone、iPad,咁使用起上黎就會突顯到方便。例如我要將一段影片由iPad轉移到MacBook Pro上面進行編輯,但係大家都知道Apple嘅AirDrop速度特別慢, 而且容易斷線。我首先將文件上載到iCloud +,之後MacBook Pro 下載,雖然係多一重步驟,而且亦都要花比較多嘅時間,但係絕對可以避免斷線要重新再使用AirDrop傳送呢啲問題出現。當然除咗相片影片之外,亦都可以好似Google Drive咁樣上傳任何檔案文件。

iCloud +除咗純粹當係一個儲存媒介之外,亦都有好多專屬安全服務提供,例如可以自訂傳送郵件的地址、iCloud私密傳送等等,對於使用蘋果系統嘅用家來講絕對係好方便。(有興趣就自己上Apple睇吓仲有啲咩功用,因為實在太多未能盡錄)

⭕️ 對Apple全家桶用家非常方便,而且也可以全家分享
❌ 非蘋果用戶使用性成為0
Amazon Photo

呢個其實我想講嘅就唔係Amazon Drive,而係訂閲Amazon Prime附送嘅Amazon Photo。我個人係以年費訂閱Amazon Prime Japan服務,4900円,當中附送Amazon Photo,而且更加唔使好似Amazon Prime Video要掛VPN先可以使用。

經Amazon Prime訂閱附送嘅Amazon Photo係不設容量上限。類似以前Google Photo無限制上傳相片嘅道理。當然只限相片,影片係會計算5GB容量入邊。上載和下載都唔會影響像素,而且更設有AI自動分類,例如根據外貌或者拍攝地點分類,方便回看。但係如果一次上載超過600張圖片,中途很容易出現錯誤,需要重新由頭上載;而且想下載嘅時候每次最多只可以200張相,絕對係略有不便;而且往往上載和下載速度都相比其他介紹為慢,需要用上更多時間。而且近幾年AWS 不斷出現輕微故障,雖然一直未有用戶反映相片消失,但係如果真係害怕遺失嘅話,絕對唔太建議選擇Amazon Photo。

⭕️ 無限制容量,而且所有相片不會壓縮
❌ 價錢昂貴,上下載亦都容易斷線
Dropbox/BOX

大約係八、九年前左右,我朋友同我講話呢兩個果陣時登記、可以提供永久50GB免費儲存空間,所以就都係呢兩個網站都開設帳戶。但係用咗大約兩年左右,魔鬼細節就開始出現。

相比起Amazon Photo,呢一類網站比較似係Google Drive,但係又有些不相似。雖然我登記時提供50 GB儲存空間,而且任何檔案類型也可以上載,但係當優惠期過咗回復正常之後,雖然50 GB儲存空間沒有消失,但係相比之下上載和下載檔案便設立了限制。好記得嗰陣時每一次最多只可以同時上載200個檔案,而且必須等待完成後才可以繼續上傳,對於我有不同相片需要上傳需求來講係略有不便,雖然呢個都未算係致命傷,我都仲可以分開多次上傳。但係對我來講致命傷係每次下載只可以同時下載100個檔案,而且下載速度奇慢,我想在200張圖片大約只需要5分鐘,但係下載回那200張圖片需要接近15分鐘,而且更需要分開兩次下載。更嚴重嘅係如果我想上載影片,如果想做免費仔根本無可能上載,因為設有每個檔案上儲存限制,所以彷彿對我來講都係得物無所用,所以我讀完書之後都停用了。

⭕️ 經常有不同新用戶優惠,就算唔課金都唔會太影響使用
❌ 免費用戶每個檔案上下載均設有限制,而且會根據唔同時段上下載速度都有分別
舊電腦改裝NAS

呢個原本真係唔諗住講,因為都算係一種異類,但係既然都講咗咁多,不如就講埋呢個。相比起以上任何一個方案,呢個絕對係一個接近零成本嘅方法,因為你只係需要一部舊電腦就可以完成。

至於方法就我相信大家自己上網會比較好,因為如果我係度講相信又係另外一篇文章。不過相比其他方法,呢一個絕對係一個好高風險嘅方法。首先因為需要安裝另外一套系統,電腦本身硬碟內所有資料必須要清空,而且因為主要是採用上咗年紀嘅電腦,零件如果出現問題需要debug嘅時候可能要花好多時間先搵到問題,而且未必搵到零件取代。但係,相比起市面上任何一部正在販售嘅NAS,即使係5年前、10年前嘅舊電腦,速度都絕對優勝,淨係單單果一粒CPU已經完勝。所以針永遠都無兩頭利,雖然呢一個方法係可以減少電子垃圾嘅出現,而且可以靈活使用舊電腦,但係始終零件比較舊,耗電方面未必比最新嘅NAS優勝。

⭕️ 只要有一部舊電腦就可以成為NAS,不單止可以減少浪費,更加節省金錢
❌ 需要具備一定基本電腦常識;採用舊電腦,零件可能已經老化,要尋找和修復錯誤時候絕對唔係一件容易嘅事

希望以上唔同嘅分析可以幫到大家選擇,因為我相信相片嘅回憶大家都希望繼續保存落去而唔係剷除,希望大家可以搵到個合適自己嘅方案繼續回味唔同嘅回憶。咁就下星期六再見,拜拜

喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明
2

看不過癮?

一鍵登入,即可加入全球最優質中文創作社區