潮乜春
潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

農曆新年應該選擇睇Netflix 還是 Disney+?

反正今年農曆新年假期都好難有機會可以同親戚見面,不如就留返係屋企自家發電。但前前後後假期加埋成個星期,電視又無乜野好睇,咁不如搵返幾套電影同劇集睇,但串流平台選擇,應該揀訂閲邊個?

雖然網上都有好多人有唔同介紹,但不妨再睇多一個介紹,再決定都未遲。

依家市面上咁多串流平台選擇,應該點樣揀?首先,唔合法嗰啲當然會喺度講啦,另外,HBO GO 同hmvod 因為身邊完全無人用,加上沒有了解當中所提供嘅內容,所以亦都唔會喺度講。不過首先,如果你好似我咁,會追新番嘅,我一定諗都唔會諗咁建議你選擇Amazon Prime Video Japan,因為基本上大部分新番都會有提供,例如今季最熱門嘅《戀上換裝娃娃(その着せ替え人形は恋をする)》,或者想搵返套舊番,例如《K-ON!輕音部(けいおん!)》你都可以搵到,所以絕對值得購買,不過記得係訂閱Amazon Japan Prime,4900円一年果個,因為提供嘅絕對唔止呢個,至於有啲咩就自己研究啦,我就唔多講。不過Amazon Prime Video Japan缺點就係要用VPN先可以觀看,同埋全部都係日文配音,日文字幕,對唔少人黎講可能會好辛苦,不過我相信對宅宅嘅大家黎講呢個絕對唔係問題。

不過亦都好相信,會睇我文章嘅宅宅真係唔多,咁所以既然都講得類型,不如就首先從類型入手。咁當然啦,前題就梗係你唔知點揀單嘢要諗呢樣問題;但如果你係打算睇由迪士尼、PIXAR、MARVEL STUDIO、國家地理頻道(NATIONAL GEOGRAPHY)或者二十世紀霍士(FOX)製作嘅電影同節目,例如:長達超過四個鐘嘅《埃及妖后》、以一場海難作為背景嘅《鐵達尼號》、每年三原色台聖誕節播完又播、唔知播咗幾多年嘅《寶貝智多星系列》、又或者近年熱門大作《X-MAN》等等,你除咗Disney+之外都無得揀。但如果你比較想睇一啲歐美製作或者亞洲製作嘅劇集同電影,例如《華燈初上》、《魷魚遊戲》、《Drive to Survive》等等,咁你嘅選擇就一定係Netflix。不過如果我自己咁睇啦,如果你同我一樣都係好鍾意睇動漫,如果又唔想咁麻煩睇Amazon Prime Video Japan,其實Netflix絕對都係一個唔錯嘅選擇。因為Disney+提供動畫嘅選擇少之又少,除咗佢自己製作嗰啲之外就得返《阿森一族》係可以睇,相比之下Netflix提供唔少新番選擇同埋獨家節目,例如《古見同學有交流障礙症》、《愛哭的我帶上了貓面具》、《進擊之巨人》等等,比較適合大眾嘅選擇。而成人內容(R-18)方面,其實兩邊都有,不相伯仲,不過Disney+因為有二十世紀霍士同STAR嘅緣故,比較多少少成人電影;反而Netflix就比較多成人劇集,所以就鹹魚青菜各有所好。

比較完內容題材就比較下畫質。你可能會問,畫質唔係高清或者睇到無起格已經夠啦咩?對好多人來講可能係,但係正如我上一篇選購Router咁講,科技日新月異,有新嘅就梗係買新啦,有得睇最好嘅何樂而不為?所以畫質對我來講都係一個幾重要嘅嘢。如果講畫質,雖然兩者都可以睇到4K,但Disney+比較優勝,除咗一個價錢便可以睇到4K,唔使好似Netflix 咁樣要訂閲最貴嘅Plan先至可以睇到4K之外, 部份近年製作嘅電影或劇集更加支援HDR10/Dolby 5.1,甚至有部份更支援最新的Dolby 7.1(不過唔好問我呢啲係咩嚟,因為我都唔熟,淨係知道聽落好似好勁咁)。不過無論係想睇咩嘢質素都好,前提都要你部電視或電腦支援呢一種類型嘅播放。好似我咁,我部電視買咗最少四、五年,當年仍然未流行Android TV,所以我的店是只是一部普通可以基本上網的SmartTV,所以就購買了 TV,連接電視播放。不過值得留意嘅係,Netflix有個別影片唔知點解唔可以喺電視或者 TV 上面播放,一定要在電腦才可以順利觀看,我以為只是我個人問題,但有朋友同埋上網亦都見到有類似嘅問題出現,所以可能要稍作考慮。另外亦都給大家一個參考數據,不過很多人可能也沒有需要,純粹只供參考之用,就是如果以一套30分鐘的節目,同樣以最高畫質播放,Netflix 大約只需要1GB流量左右,但Disney+就要接近1.5-2GB流量左右,如果你屋企唔係好似我咁用光纖1000Mb/s上網或者用一啲比較平嘅Router,有機會出現搶線情況,所以最好都係盡可能用LAN線連接而不是用Wi-Fi連接,以達致欣賞最好的畫質。

好啦,最後就梗係講一樣大家最關心嘅問題,當然就係錢。如果純粹用價錢黎講,Disney+絕對贏九條街,$73一個月嘅價錢,最多可以八個人分享啦,如果搵埋啲叔伯兄弟姨媽姑姐親戚好友,平均每一個人都只係~$10一個月,可能當只係買一份早餐嘅價錢已經可以係一個月嘅娛樂,而且更加唔使理畫質低劣呢個問題;相返Netflix ,$93一個月,最多只可以同四個人分享,一個人大約~$24一個月。相比之下,Netflix 絕對遜色不少,不過正如我上面咁講,如果你想睇比較多原創內容,或者近年獲得獎項或者唔同電影比賽入圍嘅電影同劇集,Netflix 絕對係你嘅不二之選;但如果你只係想呢個假期唔好咁悶,或者純粹想知係有啲聲聽吓、有啲劇集電影咁睇吓,Disney+絕對係一個便宜嘅選擇。

最後就講吓我自己,我就兩個都有訂閱,不過就絕對唔係因為我有錢啦,因為咁啱身邊有朋友都想睇,咁所以就同佢哋夾,除翻開一個月都係~$35左右,真係當食少一餐飯都已經足夠睇一個月。不過如果你問我鍾意睇邊個多啲,我應該會答你Netflix,始終適合我睇嘅節目比較多,而Disney+感覺上係比較偏向小朋友睇多啲,雖然我都知道佢都有好多唔同嘅電影同節目,但係感覺上個名同內容有啲且唔想關係,所以其實內心都仲係有少少抗拒。

衷心多謝你又睇完一篇廢文,反正好快就新一年,首先就祝大家新一年身體健康,因為疫情嘅關係呢樣嘢變到好重要,另外就再祝大家虎虎生威,過年後再見。走之前希望大家可以慷慨解囊係下面拍五吓手,作為繼續支持我創作嘅原動力,お願いします。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

第一个支持了这篇作品
加载中…

发布评论