香港仔遊記系列 某年日本初度遊電波之旅回憶錄 (3)

[好幾年沒有外遊, 加上疫情下沒能外遊, 只能翻看自家陳年日本旅行遊記並分享舊文章來抒懷]

第三日 — 某年5月1日

日本之旅去到第三日, 前一日買左上午9點07分既頭班嵯峨野列車既車票, 諗住呢一日搭”晨光第一線”去嵐山觀光, 點知「訓過龍」, 搞到去到車站時已經miss左班車, 之後唯有搏下問車站職員姐姐可唔可以搭下一班車啦, 點知可以搭下一班車喎 ^^, 不過係企位, 咁都無計了, 照搭過去了, 點知到左嵐山站都唔知, 一次過去到尾站 — 龜崗, 一個冇乜野睇只係俾小朋友騎玩馬仔既地方, 因為下一班車要等成一粒鐘, 於是我就在車站附近 hea 行一陣就搭番去嵐山了

去到嵐山已經上午11點幾到中午12點, 跟住去左行嵐山竹林, D竹林入面行果個 feel 都OK正架, 就算人多都又唔熱又唔焗行得又舒服, 之後因為想行去大覺寺但又唔識行, 於是就問果度既人力車伕哥哥仔, 好彩問下咋, 原來要行去大覺寺好難架, 最好搭車過去, 所以我即刻行番出去搵車站搭車去大覺寺了去到大覺寺, 呢間寺廟行得有少少似迷宮咁, 因為我兜兜下都唔知兜左去邊 :-P, 不過間寺廟起得都幾靚架 (從寺廟建築角度上睇)

之後行完在車站等車返去嵐山渡月橋果陣就順便開餐食少少野當 lunch 了, 之後因為上錯車去左另一個唔算好遠既地方, 咁我就唯有在果度等另一車去返嵐山了, 返到嵐山都下午3點幾了, o係果度我行左一陣附近既商店街, 之後行埋渡月橋同嵐山公園, 雖然果度d櫻花已經開完得番一大片綠色既樹葉, 但果度依然有好多中學生去學校旅行, 仲有一班唔知係柔道、空手道定係跆拳道既人在水中修行兼大叫口號添, 不過嵐山遊全程都下住毛毛雨, 係美中不足的地方, 行到下午5點幾左右, 就在嵐山車站搭車返去京都河原町同錦市場度掃街搵食同行河原町步行街, 總結呢日全日都在嵐山度過, 回到旅館竟然係唔知晚上7點幾定8點幾, 第一次咁早返到去休息, 好彩冇再見到前一晚跟住我果個大叔啫 :-P

返到旅館, 諗住去沖個靚涼啦, 但老闆話有人用緊, 咁我就返房等消息了, 冇幾耐, 老闆俾左旅館小澡堂既鎖匙我話俾我用小澡堂, 嘩~~~一個人包哂成間小澡堂仲要係 free 果隻呀~~~~ 勁正囉 ~~~ 跟住我就9秒9火速行入去浸了, 一浸就浸左大約半個鐘, 當堂感覺個人好舒服好relax, 同特別乾淨 XDXD, 之後見住在旅館的大叔冇好似平時咁圍埋在旅館電腦前傾偈, 咁我就膽粗粗咁問老闆可唔可以用腦上網啦, 嘩~~~原來都係住客可免費使用架~~~ great ~~~ 不過因為唔係自己私伙, 都唔敢用太耐, 只係上左一陣FB同check email就算了 :-P

第四日 — 某年5月2日

前一日幾乎全日在嵐山渡過, 而呢一日就周圍去幾處地方了

唔講唔知, 「黃金周」並不是中國的專利, 在日本都有「黃金周」, 不過日本既「黃金周」比較特別, 特別在佢中間斷開左兩日, 先放四月廿八至三十日, 之後五月一至二日要返工, 然後再放五月三至五日, 所以前一日同呢一日在車站搭車都超多人,尤其是好多清一式「黑老西」 （著黑色西裝外套的男白領）同清一式在車上坐低化「行」庄的OL, 在車站同車廂人迫人既程度, 你會覺得身處平時最繁忙時間既香港車廂咁

呢一日, 唔知點解, 突然好早就自然醒起身, 醒果陣只係當地時間上午6點幾, 跟住我就好慢條絲理咁梳洗出發去京都銀閣寺了, 經過前兩日在京都車站搭車的經驗, 我去到京都站已好快咁找到我需要搭車既車站了, 之後就一路坐到銀閣寺落車

其實呢幾日真係乜都唔使諗只係日日粗略plan下一日想去邊度再到時自己執生 re-schedule, 真係好enjoy, 如果佢唔係日日落雨, 我會更enjoy, 去日本果六七日, 除左到達同離開日本果兩日之外, 日日都落雨, 落雨都唔重要, 仲要勁大風咁撇雨果下至「攞景」嘛 ~~~ > <

呢一日都係一樣, 我一起身已經係落緊雨了, 但冇計, 電波旅行就係要風雨不改嘛, 到左銀閣寺, 發現其實銀閣寺相對其他京都寺廟真係「小兒科」, 冇乜野睇, 唯一可取之處係在銀閣寺的山邊小徑上可以遠望京都市, 好快就行完左銀閣寺走去第二度了

可能因為日本人返五月一至二日又放假啦, 前一日同呢一日都見到唔少中小學生搞學校旅行, 由銀閣寺走返去車站一路都見到, 之後見有路行另一景點 — 哲學之道, 就諗住睇下何謂「哲學之道」了，一路行其實越來越覺得冇櫻花開既哲學之道其實真係好深奧, 佢深奧在我唔知佢既「哲學」在邊一度, 一路行我亦唔知在呢個哲學之道入面行左幾遠, 全程又冇乜人行, 之後, 由於冇櫻花下的哲學之道實在哲學得滯, 唔係我呢個凡夫俗子可以理解, 最後我在果度既「哲學」修左一半就修完去第二度了 :-P

之後搭車返京都站中途見到一個巨型既紅色鳥居, 俾佢吸引左下車去平安神社行下, 間神社「紅當當」咁幾有特色架, 入面係好空曠既沙地同寺廟, 但我只係行左一陣就走了, 因為冇乜野好睇 :-P

之後轉去行清水寺, 對於呢個寺廟, 我只可以用「鬼斧神工」來形容, 真係好古僕同好宏偉, 我個人覺得佢直情係「京都寺廟之最」, 不論係寺廟建築定係在寺廟眺望既京都景觀都係好正既 ~~~ ! 清水寺亦係我在京都留得最耐既寺廟, 下次有機會都會再去過 ^^ 在清水寺草草食完幾個飽仔做 lunch 就繼續搭車向京都站出發了

之後見順路, 就中途去埋三十三間堂, 三十三間堂我冇記錯佢係因為係一間有三十三間房既寺廟而聞名的, 唔知係咪三十三間個勢太勁, 加上強風細雨, 我果把跟左我好耐既「城大短遮」（唔記得係邊一年Open Day攞定係朋友送既）, 在三十三間堂門前「壽終正寢」了 =.=, 由行三十三間堂到行完三十三間堂之後都要一路淋住雨咁行去車站等車去京都站 =.=, 三十三間堂其實都係一個唔錯既寺廟, 不過對我的吸引力唔大 :-P

之前聽朋友講, 奈良途左奈良公園外冇乜野好行, 大約半日就行完, 咁我見返到京都站都只係下午3點幾, 時間尚早, 就即刻搭車去奈良了, 點知好死唔死, 坐左最快既特急車之餘我仲要唔知我手上既「關西三日遊」坐呢d車唔同坐其他車咁唔使錢, 當我上去冇耐俾個大嬸用日文話我坐左佢個位果下, 我就已經知道上錯車, 但我唔想轉車 (因為其他去奈良既車最快下一班車好似要成半粒鐘之後才到京都車站), 於是諗住「博大霧」啦, 點知唔知係果位大嬸報串定係其他人報串, 定係本身就有職員會巡查車票, 我就係因為咁, 在架車去左一半路程時俾人發現, 好瘀…=.=, 最後俾多左 500yen 巡查員買臨時票 =.= 嗱！諗住「博大霧」呢家野咁失禮大家千祈唔好學, 因為在日本咁樣做諗住側側膊唔多覺係唔啱架, 我後生果陣唔生性做過呢一次之後亦再冇做過呢D衰野了，亦記到而家去警惕自己去外國搭車時唔好再做…=.=

去到奈良, d雨細到唔使擔遮, 但我都係9秒9行去用 500yen 買左把大遮等之後有得用, 日本果幾日陰晴不定嘛, 買定備用安全d, 之後一路行公園, 都見到好多鹿, 仲要見到佢地俾人餵完一次之後係咁跟住果個人唔放, 仲要咬穿人地個膠袋, 搞到我本身對佢地冇乜野既都變左要「敬而遠之」:-P, 不過都俾D鹿突然迎面跑來嚇左兩次, 好彩佢地都算馴良, 只係在我面前企定定唔郁一陣之後行開唔理我 :-P

在奈良公園入面行左東大寺同春日大社, 在春日大社入面見到好多許願繪馬俾人許願長壽, 我諗春日大社應該係管長壽既寺廟了, 於是我都趁熱鬧咁用左 200yen 買左個繪馬為家人許願了, 我當時稱呼呢D繪馬叫「傻仔牌」, 因為掛上去冇耐就會俾果度既工作人員「除牌」架了（後來上網搜集資料才知好似工作人員會俾寺內既人拿去燒來祈福）, 但依然仲有好多傻仔會照許願既, 當然包括左我啦~~, 就係因為果日冇為自己許願長壽健康而只為家人求長壽健康, 搞到而家病鬼左俾老朋友「死氣喉」（氣管敏感）來探我了 ~~~ > ~ <

行完春日大社之後已經 feel 到對腳行到用「勁痛」來向我投訴, 放是我就由春日大社慢慢咁行去奈良車站了, 中途經過五重塔, 又係冇乜野好睇, 睇左一陣就繼續走去奈良車站行步行街兼 dinner，dinner 完就返民宿旅館了, 果陣又係好早咁唔知係晚上7點幾定8點幾返到去, 於是又有得借電腦上FB同check email了 XDXD

#日本 #遊記 #旅遊 #旅行 #化讚為賞 #化like為coin

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)