JFans
JFans

喜愛在愛情、工作、教育、娛樂及社會民生等抒發自己所思所想

日本某年紅葉之旅 (7)

[好幾年沒有外遊, 加上疫情下沒能外遊, 只能翻看自家陳年日本旅行遊記並分享舊文章來抒懷]

第十日 — 某年11月22日

呢一日去左東京郊區高尾山一日遊加晚上Skytree欣賞夜景

之前已經好想去高尾山, 因為上網睇過資料話呢度無論睇紅葉定睇景都好正, 真係聞名不如見面, 唔係好正, 而係超正~~~~ XDXD

由於要由東京市區搭2至3個鐘頭JR火車至去到, 所以果日都上午七點至八點左右出發在東京搭JR火車, 去到上午十點幾左右, 一去到高尾山車站已經有唔少人準備行山, 去出名景點郊遊有樣好, 就係跟大隊實冇死錯人, 就算唔識行盲中中咁跟住多數既人行緊既路都一定去到目的地 XDXD

之後跟左大隊去車站度轉車上山, 可以選擇坐纜車或者吊車, 我呢D鐘意刺激既當然坐吊車啦 :-P, 不過本身其實有少少畏高 (睇唔出哩~~~), 所以全程久不久都渣實扶手, 仲要做高危動作 ~~~ 唔係搖來搖去搏跌落車, 而係單手拿相機影相 (睇到呢度大家可能會係咁”cher..."我~~~ 但我係講堅架, 若果我稍為手震或跣手, 部相機都會粉身碎骨架嘞…因為我唔係下下拿得穩陣 :-P) 我之所以咁拼搏去影相, 係因為由吊車望上去既視野好正~~~不枉我揀坐吊車, 可以影下前面紅葉相, 又可以影下後面東京城市遠眺既風景相 ~~~~ 就係咁一路坐一路影住風景相咁上到去山上了

上到去, 我見到有唔少人都上去一個小型瞭望台度, 咁我當然唔執輸上埋一份啦~~~上到去一望~~~我係咁”嘩~~~好正呀~~~”咁款, 因為望出去既紅葉城市景觀, 真係正到十級核爆, 可惜我果部只係普通數碼相機, 影出來既相未足以顯示果度有幾咁正爆~~~所以, 大家去日本東京, 尤其是紅葉季節, 真係不妨去下高尾山~~~ XDXD

o係個瞭望台都”嘩~~~”完一輪, 就落台去山上其他地方去追紅葉嘞 ~~~ 沿途一路行都會有唔少唔同色彩既楓樹景致~~~之後去到一個廟,去左跟其他人一樣排隊敲鐘轉大石 (香港興轉風車, 果度係轉大石, 都係轉下求好運果D~~~), 果度冇乜紅葉, 所以好快去左第二度 :-P

一路跟住遊客大隊走, 去到一個景點, 再一次令我”嘩~~~好正呀~~~”, 果度俾我見到一大片高山, 仲要離遠望到富士山, 勁多人停低睇同影相同野餐, 我就先在果度附近既小店度食烏冬填一填肚至出去影相, o係果度又係留左好耐慢慢欣賞完至走~~~不得不提, 果度其實都有唔少紅葉架, 不過俾唔少人佔據哂有利位置影相, 所以唔係影左好多 :-P, 就係咁留左大半日, 臨走前再坐多次吊車, 再影多幾張相 :-P

在東京dinner完, 見時間尚早就去左Skytree度欣賞夜景, 果度既夜景我個人覺得同東京鐵搭都係差唔多咁正, 但如果二選一我會揀Skytree, 因為高D嘛~~~ :-P (我係一個有少少畏高但又鍾意上高既地方遠眺風景既人~~~都幾矛盾架~~~:-P), 欣賞完夜景, 在Skytree下欣賞多一陣Xmas 燈飾至走

臨尾諗住搏下機會, 去上野睇下仲有冇店開門做生意, 當然係收哂檔咁滯啦, 我去到果陣成晚上8點至9點了…唯有下回請早啦~~~ :-P, 跟住即刻搭JR火車返hostel了~~~ ^^


第十一日 — 某年11月23日

呢一日由於下午要搭新幹線去大阪, 所以唔諗去太多景點

第一站去台場, 晨早流流去台場其實係有D冷門, 但我怕晏少少去到會開始多人, 未必攞到啱feel既位置影風景, 所以我早上去當係晨運 :-P, 果日天氣好好, 可以好悠閒咁行下影下風景, 行左大半個鐘至一個鐘左右, 就出發去全日我最想去既地方 — — 新宿御園

呢一度地方好大, 足以行半日至大半日, 雖然佢既景致冇我之前去既國営照和紀念公園咁壯觀咁正, 但都唔係差太遠~~~~ o係公園一路漫步一路欣賞周圍既大自然景色同林林總總既人一家大小咁悠然自得地野餐, 個心真係會舒暢好多架~~~ 至少我就係咁啦~~~~ XDXD 就係咁行下坐下再行下影下, 咁就留左半日了 ~~~ XDXD

之後下午3點至4點左右, 出發搭新幹線去大阪, 經過4個幾鐘既新幹線車程, 終於來到大阪了 (應該係回到大阪至啱, 因為之前係在大阪玩幾日先 :-P), 之後去買幾日後既通宵巴士飛 (之後會有機會由大阪坐通宵車返東京, 預早買定至有位), 見仲有少少時間, 就去左心齋橋食拉面了, 果晚冇行街只係去左面檔食完就走人了

下一站係大家都估唔到既關西機場~~~何解呢? 我唔係提早著草返香港, 只係在果度過一晚夜啫~~~ :-P, 由於第二朝會有兩位朋友由香港飛來日本大阪, 然後我地會三人行跟手飛去福岡展開九州遊, 咁我又唔想花費金錢去hostel而只住幾粒鐘, 於是就在機場過夜訓機場了~~~ 大家唔使擔心關西機場過夜唔安全~~~首先我已經冇穿冇爛咁返左來好耐先 ~~~ :-P, 其次就係果度真係好安全~~~! ^^ 果度夜晚會有警員孖咇每隔1至2個鐘就巡場一次, 仲會同所有過夜人士登記資料, 仲會好溫柔咁提示大家要小心財物 (我係講堅架, 佢地真係好nice架~~~), 最重要既係, 過夜人士都為數唔少, 大部分都係香港七八十後加少部分係外國人, 再加”小貓三兩隻”既台灣人, 所以唔會有事 XDXD 唯一不足之處係, 張長椅唔夠濶, 再加上我好睇緊自己既財物(今次冇將D行李放coin locker, 諗住只係幾粒鐘就直接跟身算), 成晚都好醒訓, 訓下醒下咁, 就係咁就過左一晚了 ^^

之後第二朝等到我兩位朋友來到, 就「拿拿淋」飛去九州了 ~~~

#日本 #遊記 #旅遊 #旅行 #化讚為賞 #化like為coin


讀者如喜歡這篇文章 ,可於文章最下方按下Likebutton以示鼓勵及支持,若讚賞公民請先登入再按下Likebutton ,最多可按5至6下,而其他人士也可以於網絡了解LikeCoin及考慮是否註冊成為讚賞公民,若想成為讚賞公民可按以下連結︰https://likerland.app.link/?event=app_referral&referrer=tracy2018(下載APP登記註冊並通過短訊驗證後,你我還可有機會各獲 100 LikeCoin 作奬勵)

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论