日本某年紅葉之旅 (3)

[好幾年沒有外遊, 加上疫情下沒能外遊, 只能翻看自家陳年日本旅行遊記並分享舊文章來抒懷]

第二日 — 某年11月14日

第一站 — 高野山

今日天朗氣清, 去左行高野山, 一個幾寧靜的郊外地區, 仲要坐登纜車上斜至去到

本身諗住會見到好多紅葉, 不過, 果度紅葉就冇乜了, 但果度既郊區景色都不過不失, 最後由上午10點幾行到下午1點至2點左右, 終於o係行去最後一個塔果條小路度見到紅葉, 仲幾靚添, 都算不枉此行了 XDXD

第二站 — 梅田City

由於係郊區, 返到市區都過左下午5點了, 天都黑哂, 於是我就去左梅田City睇夜景, 我去日本最愛既活動, 就係睇夜景啦 XDXD, 果度地下仲有Xmas攤位賣野, 不過冇興趣 :-P, 果度既夜景真係好正架, 日間去睇景都好正架, 所以就算要由車站行一大段路至去到, 但我每次去日本大阪都必去梅田City架~~~XDXD

第三日 — 某年11月15日

今日去左京都一日遊, 去左好多地方睇紅葉, 好彩呢一日見到唔少紅葉

第一站 — 東福寺

呢個地方對日本人來講幾出名, 但唔係好多外國旅客知, 我本身冇諗住咁早行呢度, 但因為我公司有位幾啱傾既Senior話呢度D紅葉景幾靚, 值得去睇, 同埋唔係好多外國人知, 唔會太迫, 咁我第一站就去呢度了~~~

去呢度其實好方便, 在JR京都站搭向奈良方向既JR車, 第1站就係東福寺站, 出站後行十分鐘就到了 XDXD

果度雖然只係剛開始有紅葉, 唔係紅當當, 但又紅又綠咁花哩花轆都唔錯, 可惜我部相機唔係單反相機, 影出來既相片反映唔哂實景有幾靚~~~~行哂成個東福寺影完葉, 出去見到路牌指伏見稻荷大社行十五分鐘就到, 於是就心血來潮行過去了, 本身好似冇Plan到行呢度既, 因為以前行過, 不過最後都係行左過去 :-P

第二站 — 伏見稻荷大社

沿路望住路牌咁行, 唔知行左幾耐, 不過一定超過十五分鐘, 最後行到大社了, 呢度既「招牌菜」係無盡既鳥居~~~~要行哂所有鳥居要大半日, 所以我行左一半左右就算了 XDXD, 沿途有涼風又唔太焗, 都算幾好行既, 行完鳥居就行番去JR東福寺站再搭車去JR京都站, 在京都站地下街食lunch了

第三站 — 御室仁和寺, 哲學之道, 銀閣寺

食完lunch在JR京都站外面既巴士總站, 搭巴士去御室仁和寺~~~呢個D景都唔錯, 同埋呢度既紅葉係我全日去過見到最多既紅葉, 我都不期然留耐D影多D紅葉相~~~呢度同東福寺一樣, 好多日本長者同中年人去睇紅葉, 同埋有台灣旅客去, 反而冇乜香港人同中國人, 之後見哲學之道好近呢度, 咁就去左行哲學之道, 可惜上次行呢度諗住睇花但無花睇, 今次行呢度諗住睇葉但又無葉睇….=.=, 我今次行完成條哲學之道, 都依然係「哲學」到我唔明呢條路點解咁出名, 可能我每次來的Timing都唔啱而領悟唔到佢既「哲學」啦 :-P, 行完哲學之道, 見再行一陣就到銀閣寺, 咪行埋佢去埋銀閣寺囉 :-P, 銀閣寺本身冇諗住去既, 因為Research過呢度係冇紅葉既, 估唔到呢度又俾我搵到少少紅葉喎~~~~, 真係出乎意料之外了 XDXD, 行完睇完成個銀閣寺, 就行落去搭車返JR京都站, 中途見到平安神宮附近有少少紅葉, 心血來潮下落左車影紅葉, 影完紅葉之後, 排隊等左好耐至上到車返JR京都站, 仲要中間轉左車至返到去JR京都站 (因為開始等車果陣已日本時間下午5點幾, 果邊D巴士班次開始冇咁密了….所以要快D去返京都站唯有中途落車轉架密D班次既車希望可以快D), 最後又在JR京都站地下街食完dinner就返大阪既hostel了

總結全日既行程, 有一半都係唔跟Plan即興咁去既 :-P, 呢個就係獨行背包客既好處, set好左大Plan之後, 可以到時再根據情況隨機應變改Plan XDXD

#日本 #遊記 #旅遊 #旅行 #化讚為賞 #化like為coin

讀者如喜歡這篇文章 ，可於文章最下方按下Likebutton以示鼓勵及支持，若讚賞公民請先登入再按下Likebutton ，最多可按5至6下，而其他人士也可以於網絡了解LikeCoin及考慮是否註冊成為讚賞公民，若想成為讚賞公民可按以下連結︰https://likerland.app.link/?event=app_referral&referrer=tracy2018（下載APP登記註冊並通過短訊驗證後，你我還可有機會各獲 100 LikeCoin 作奬勵）