員工體驗研究員
員工體驗研究員

討厭工作有十萬個理由.喜歡工作只需一個原因 員工體驗研究所陪你一同研究怎樣開心工作。

老細識講嘢嘅 返牛工都順氣少少

如題,老細識講嘢,返西工條氣都順少少。

當然,你可能即刻笑筆者無大志,質疑點解要返西工。問返你啦,依家呢個社會有幾多份唔西的工,筆者只想在芸芸西工之中搵一份無咁西的工。上司/老闆唔西,已經想偷笑。

咩係西上司?要學術考究啲釋義,自己睇返網路大典啦。西上司無處不在,但高階西上司識講嘢,令你經常懷疑究竟佢西定唔西,係咪自己諗太多。明明嗰要求好似都幾嚴苛,佢講到係為咗係要征服星辰大海;明明就係要我吔捽數,佢講到係everything is possible,we can do anything。明明係要用盡你,佢講到係共同拼搏努力邁進。噢,語言的偽術是多麼的美。

簡單講,識講嘢,屎都可以變咖喱。而識講嘢,係平時相處都要識講嘢,先可以成為高階西上司。點樣先識講嘢,睇自己造化,筆者今日舉幾個好明顯低階西上司先會講嘅例子,大家已讀又好,慢慢鑽研都好,自便啦。

你覺得你覺得,關我蛋治

「我就覺得office可以買多啲生果,因爲健康啲。」
「我認爲呢件事非常重要,可唔可以即刻開會傾下?」

So?關我事?

其實呢兩句唔係有咩惡意,有時都有啲建設性,但聽落去好似有啲微妙。點解呢?因為嗰「我」字。你可能想鬧我講嘢唔用「我」字,唔通用「你」字啊?咁當然無咁憨居啦。但老老竇竇,其實咩都「我覺得」,我點解要知你覺得啲咩?我點解要關注先?你想點咪做飽佢。

成班人只會當你開壇吹水,反正咩都係你覺得,唔需要我哋同事覺得咩啦,咁姐係偽溝通啦。OK,不要問不要聽不要說,只管夠鐘收工走人byebye。識講一定講「我哋」,「我哋打算...」「我哋要唔要...」「咁會影響我哋...」,講到嗰議題係關大家事,綁埋一齊,其他同事先會正視你講乜,同埋覺得邀請緊自己表達意見。

老鬼想當年,sor我仲未出世

每次返intern或者新人入職,咪通常有個supervisor或者mentor傍住嘅。咁通常嗰場面都係咁,一係就無人理你,你自生自滅,一係就嗰老鬼捉住你暢遊古今。

小至辦公室格局,大至公司項目規劃,嗰senior吹足全日。跟住為咗之後建立緊密合作,佢好有心機地大談過去豐功偉績,滔滔不絕如江河水,噢,原來係口水。直至你微笑提醒lunch hour 差唔多完啦,佢終於停。

想當年,其實我仲未出生又係咪要話埋俾你知。

當然有個人抽取時間傍住自己係好過放養,但其實可以講少啲威水史,因為新人唔會覺得有共感,同埋感覺太遙遠。一個高階西上司唔會神化自己,反而要夠落地,先可以打入下屬內部,令班下屬分唔清敵我。佢哋唔會齋講勁嘢,而係會講自己都失敗過,當然結局一定係爬得起身,適量加入「人味」,就好似啲電視劇嗰主人公開頭永遠都係瀨嘢,唔瀨緊嘢點牽動觀眾情緒呢?

講多啲自己柒過啲咩,5小柒嘅程度啦,柒得合理,你形象唔會崩壞,反而好似真誠,下屬又會有代入感。你西嘅時候,班同事都容易啲覺得你都係人,會發火都正常咁囉。

再講公事,成兜飯兜落去

有種上司係幾願意傾計,但開口埋口都係公事,或者「你有咩insight」。隨時等緊佢隨時舉起右手點名,明明唔係做緊嘢都好緊張。

講句嘢要準備晒三部論證,要應付佢即場挑機,最尾仲要接受點評,如果要咁樣先可以同上司做friend,呢種朋友請恕我無福消受。同埋,食緊飯啊,俾我離開下呢個世界一陣得唔得,係咁chur我,哽親係咪計落工傷?

無人想同工作做好朋友,除非間公司係我,或者我做緊大位有分紅。你用工作做誘因真係好唔吸引,識攻心,一定講一啲細嘅有興趣嘅話題,原理同上啦,打入內部,做下好兄弟好姐妹,先頂得緊啲西脾氣。

講咩?閑話家常,各種興趣、習慣同埋嗜好。Google trend搵到大把近日話題,上論壇都有一大堆綜藝節目、劇集或者歌曲推薦,你背下講幾句又幾難?反正你開話題,唔難入口嘅話題,其他同事一定會識接嗰話題,講講下佢哋就會自high,你咪再微笑深藏功與名囉。

識講嘢,咩都易話為啲啦。

【原文網站】

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论