Anson Lo 通宵拍MV後出席商場活動

盧瀚霆（Anson Lo）今日出席活動，吸引大批「神徒」（粉絲）於現場四周及不同樓層出現，場面墟冚。配戴眼鏡的Anson Lo，以一身粉藍色西裝斯文look打扮現身，雖然面露疲態，但他不忘氹「神徒」，更大跳Moon Walk舞步，就算為大會拍照期間，他亦不時揮手又擰頭，引來「神徒」不停尖叫。由於Anson Lo昨晚通宵為單曲新歌《Megahits》拍攝MV，完成工作後趕到活動現場，現場有「神徒」大叫謂：「你通宵拍MV，我通宵排隊！」

雖然通宵工作後趕到活動現場，不過Anson Lo表示試過最長70小時工作時間，由於居住地方偏遠，今次完成MV後，便到工作人員家中沖涼換衫才前來。他說：「今早7時40分拍完，如果計埋今晚開工，就會開咗工30幾小時。依家狀況都ok，今朝化完妝就少少暈，但已經過咗眼瞓時期，不過在車上都有瞓陣，黎到見到粉絲好開心，我知道佢哋通宵排隊，辛苦晒大家，所以我都無資格嗌攰。」

對於連續3個月雄霸尖沙嘴碼頭的巨型廣告板，令網民笑指應改名為「教主碼頭」。Anson Lo笑言多謝「神徒」及客戶支持，不少人打完卡後傳送給他睇，不過也有粉絲自發性製作手工作品售賣後將錢捐給領養或助養動物慈善機構，因為粉絲知道他喜歡小動物。

提及日前於限時動態出大曬以他為題材的英文科功課紙，令家長不滿指偶像風滲透校園。Anson Lo解釋功課紙由母親傳發給他，又認為功課不關追星事，只是覺得MIRROR好像融入大家心目中，陪住大家成長同經歷大小事。談到因他演出同性戀題材劇集《大叔的愛》，有家長擔心年青人對兩性關係有所困擾。他表示日後會透過作品發放正能量，影響學生努力讀書，不要放棄學業。

談到網民票選8月十大人氣藝人排行榜，MIRROR成為榜首，當中多位成員上榜，呂爵安（Edan）排第二、第三位有盧瀚霆（Anson Lo）、第四位姜濤等。Anson Lo說：「排名同數字對我哋黎講唔係好重要因素，因為我哋重視作品好唔好聽，喺Group會互Send歌嘅Demo，有時錄音錄得唔好都會Send畀大家聽，互相畀意見會重視音樂作品。」