返工日常

同公司申請咗喺醫院做嘢,因為有個Project,呢幾日要交上去等審批,我又唔知幾時開始請產假,所以老細唔多想批假,都好,反正坐醫院等阿媽做手術,我都係冇咩嘢做,不如拎住部電腦做嘢好過.

而家份工,唔算忙,唔算多會開,老細唔算衰,難就難在,要處理下面嘅人事關係,呢個係好公司通病,通常啲仆街公司,同事之間就特別好,入呢間公司初期,因為間公司各方面真係太好,我就知道個結果會係咁.部門入面啲同事唔係差,不過梗係好似中學生咁,為啲小事搞吓小圈子整吓呢個,排擠吓嗰個咁,加上冇咩罰人嘅文化,少不免同事間,就會做嘢慢啲,交嘢甩漏啲,返工唔太準時,想搵人OT趕嘢要威逼利誘吓咁,又或許唔止罰得少,應該係連獎賞都求其啲,但求大家開心咁,造成嘅第1個後果,就係呢間嘢離職同事真係好少,後果2,俗啲講,個個都係老屎忽.

記得細細個聽老豆講,做嘢最緊要做人多過做事,到出嚟做嘢,我自己覺得就一半半啦,大概一半工作時間,用嚟處理人事嘢,以前試過做間好仆街嘅公司,日日返到去,就準備周旋喺唔同嘅野獸中間,呢季可能要埋呢堆,下一季可能又痴咗另一個堆,然後每日準備,調整返好個心情,俾心機做返好原本嘅工作,結果次次又要處理俾人出賣,或者俾人逼住要出賣同事嘅Backfire.

所以只要一諗起以前間公司,而家只係處理吓小女生嘅小圈子遊戲,平衡吓大家所需,聽吓唔同人職場上嘅小小不公,人事嗰Part輕輕鬆鬆就處理咗,不過只係輕鬆咗,但個量就大好多,所以一半做人一半做事呢個定律,到而家都未打破到,連同其他好似入職面試,離職嗲2句,鼓勵同事進修/升職等等等等,大約佔我所有工作嘅50%啦,咁我工作嘅另一半-做,事嗰Part就仲簡單,每日派功課,請大家準時交功課,然後收功課,改功課,再派返去更正,拜托同事準時交功課,呢Part大約佔我所有工作嘅20%啦,跟手就係收入同支出,大約係10%啦,剩返20％嘅時間就係用嚟開會.

呢份工打咗幾年,一路都想試吓搞好個工作流程,不過可惜,時間永遠都唔夠,因為有咗小朋友,好難好似細個咁,晚晚做到12點,我成日覺得,生活真係應該唔好去平衡,努力為工作衝衝衝,只可惜結果永遠都係,每晚都忍唔住放工就趕返去陪小朋友.