現代牧羊人

上星期6,阿仔個泳班開返,呢段疫情期間,個泳池大裝修,最緊要係光猛咗,以往成個池邊坐滿曬家長同工人姐姐,呢日得返9個,池入面嘅學生又係9個,教練加埋救生員,仲有場務超過10個人,今時今日真係生意難做.

同其他家長傾計,我哋就好似現代嘅牧羊人,每個週末就喺到趕羊仔,去學呢樣,學嗰樣,老實講,我都唔知邊個慘啲;然後,到底出去學游水,畫畫慘啲,定係齋坐屋企慘啲?正面睇,都希望小朋友,喺學每樣嘢入面,搵到當中嘅樂趣,有幸成為興趣就最好啦,所以又好想佢可以試多啲唔同嘅嘢,順便俾多啲嘢刺激佢個腦,尤其是佢星期1~5,每日已經喺屋企入面困住,而家連公園都冇得去.

有時返工,開Cam望到個仔,坐喺佢個位到發呆,個心有一吓半吓,覺得佢好慘,不過其實成長入面,俾佢坐喺到發吓呆,當係經歷一部份,又得唔得呢?