90後港媽,同老公一齊,爭幾球街數,求其搵個地方,簡簡單單俾我呻2句.
閂曬燈
呢2日差唔多放工,開Cam望一望,全屋閂曬燈,個仔自己一個,坐咗喺客廳中間,發呆.
問姐姐點解呢幾日唔開燈,佢話我個仔唔俾佢開燈,連姐姐喺廚房整嘢都唔俾佢開燈.
唔通,我個4歲仔,終於想為呢個美麗嘅地球出一分力,熄燈慳電?
我問佢,做乜熄曬燈坐喺到.
個仔就話要玩嘅玩具都玩曬,要睇嘅書都睇曬,所以坐喺到.
咁點解要熄燈呢?平時你都開曬全屋嘅燈.
佢輕輕答我:咁我都冇嘢做,唔駛開嘞!
唔知喺阿仔個人生入面,會唔會有一日,諗起細個,K1嘅時候,開學第1日就撞正3號波,唔駛返學,跟住上學期,因為街頭衝突,又有幾日唔駛返學,到下學期就因為疫情,成個學期冇咗,我唔知之後,會唔會每年都係返得半年學,香港會唔會打仗,之後台海會唔會發生劇烈衝突,之後會點?應該冇人會知.
我記得03年沙士,Form2我唔駛返學,嗰個年代都未有手機,我記得係咁瘋狂睇日劇,但我從來未試過閂曬燈,坐喺客廳中間,發呆.
喜欢我的文章吗?
别忘了给点支持与赞赏,让我知道创作的路上有你陪伴。
发布评论…