腦膜瘤

阿媽尋晚漏夜左邊身痺,老豆以為佢中風,即刻去港怡睇咩事,幾個阿哥同家姐又過去睇住,因為我大住個肚,所以今朝先Whatsapp我,去到啱啱出報告,發現唔係中風,而係腦膜瘤,已經大到6cm,所以頂住腦入面,負責控制手腳嘅部份,所以有少少似中風,暫時指數上唔係惡性,都只可用外科手術切除.

返工前趕過去探一探阿媽,啱啱醫生就解釋緊個手術點做,個醫生講嘢,又慢又細聲,唔知我仲以為佢同我個4歲仔,解釋緊,點解火星同木星中間,有個小行星帶咁.其實個手術3個鐘內完成,算小手術,揭開頭蓋骨,切除,冚返埋,完!

聽完,我覺得應該同去雞翼骨咁上下.

我同阿媽講笑,佢最唔開心應該係,要俾人鏟走啲頭髮.

其實港怡真係唔錯,連個早餐都好食啲,如果有得揀,我都想喺港怡生,可惜醫生喺養和掛單,有啲人話港怡個位隔涉,但其實都係差條香港仔隧道,除非隧道間封搞到大塞車,如果唔係差5分鐘車程,呢幾個月養和先叫正常返少少,之前太多嗰個發展中國家嘅人嚟入院-驗身買保險,真係太過People Mountain People Sea,日日都好似春運咁,最大嘅投訴係個停車場長期冇位囉.

希望阿媽呢次大步躝過,平平安安順順利利.