爭人幾球(中)

同老公2條友,2015年都遇著份仆街工,每日返工就好似返戰場咁,個腦永遠諗緊下一秒,唔知邊到有子彈會飛埋嚟,你知道無論你戴住頭盔同避彈衣都冇用,因為班仆街手上,仲有千千萬萬種唔同類型嘅武器對付你,最後你只可以搵返把刀仔同人死過,由細到大真係未入過戰場,頂咗3年最後先遲咗份工,我覺得自己都算幾叻女,事後回想,只可興幸當時喺呢間公司學到好多嘢.

因為興趣關係,老公成日走去睇話劇,然後又識埋堆話劇後台嘅工作人員,最後發現原來拍話劇,會遇到對焦困難呢個問題,就係咁,2條友拎曬幾年返工儲落嘅錢出嚟,用大概半年時間研究個對焦系統.

2016年用啱啱好6位數字嘅美金,喺LA電影重鎮開鋪,未計之前做開發,同埋前期銷售開支,帳面上除咗第1個月營收係USD-59之外,之後第2個月開始已經叫實現營收,多得當時做預售嗰個決定.頭幾個月所有會計,售後服務,培訓全部都係外判,減低開支之餘,亦都想集中精力改好套系統.直到開鋪後5個月,先慢慢減少外判工作,叫正正經經咁逐個部門逐個部門咁開返.

仲記得當年我哋都仲係好保守,成單嘢冇借錢之餘,仲要畫咗條線,至少Keep27%嘅開業資本做現金流喺手,但點解係27%,而唔係26或者28%,我都唔記得咗,好似係因為頭幾個月,幾次用咗大筆現金,剩返嘅現金,次次都啱啱好多過27%少少,所以不知不覺間就有咗呢條,唔知點走出嚟嘅線...

2017年應該係成間公司,最賺錢嘅時期,主要係當時仲未全面投資開發新嘅物聯網定位系統,但對焦系統嘅生意額,就一路係咁做上去,直到2017年年尾先開始呢場豪賭,買重注落物聯網定位系統嗰邊,係整整成個2018年同之前所有收入都賭曬落去,賭注仲要由錢之外,加埋其他嘢落注,就係帶埋個仔搬返香港.

阿仔嗰時歲半,我哋要慳開支,決定將開發資源拆一半,返亞洲呢邊起返半個開發部門,除咗嗰邊成本,實在太太太過貴之外,另外就係如果請相同人數,呢邊個進度,估計至少會俾嗰邊快一倍,眼見嗰邊啲生意又叫慢慢上軌道,就係咁帶埋個仔返嚟.

2018年返香港,首先都要解決住嘅問題,好衰唔衰,我哋係差唔多,最貴嘅時間買樓,兼鎖住咗啲資金.然後租地方請人,繼續消耗曬幾年嘅收入,2019年回一回氣,但因為眼見新加坡開放個電力市場,加上原本啲酒店同服務式住宅嘅客,對儲能系統又有興趣,結果上年再開發埋儲能系統.

2020年每一個月,要借想當初筆開鋪資金出糧,交租,保險等等等等....我唔知,個個月咁借,仲可以頂多幾多個月.