爭人幾球(上)

老公2016年開鋪,最早期做非光學對焦系統,一般嚟講,9成對焦系統,都係用相位,對比同紅外線是但一個,或者交替咁用,但對住物件多,移動速度快,或者太光或太暗嘅環境之下,暫時就未有其他對策.當時呢套非光學對焦系統,需要喺被拍攝嘅物件,或人身上,貼一塊發射器,攝影機端就加一個接收器,就可以進行準確對焦,當時呢套對焦系統,主要為舞台或運動拍攝公司提供服務.

當年嘅系統相對簡單,開發同埋改進系統上,除咗將發射/接收端嘅連線,提升準確度同收發距離外,剩返落嚟就係改良用家介面,點樣可以用唔同方法,盡快幫個用家,喺個介面上校準/微調對焦,呢方面主要受到發射器同正式想對焦個位,會出現誤差,點樣可以將個校準,準確咁縮細到1~2mm,呢個就係套對焦系統最花功夫修正嘅地方.

咁套系統,亦都其實仲有無窮無盡嘅地方,要一路用一路修改,好似淨係改良,點樣將塊40x50x3mm嘅發射器,可以穩定咁,痴喺唔同物料上,但由以唔會整傷唔同物料,已經係可以玩死自己嘅地步;除此之外,仲有要應對唔同場地嘅干擾啦,越嚟越多Wifi Router,又或者無線網絡基站,仲有出Show嘅大大小小PA System,然後室內外,又會出現唔同嘅干擾情況.

當時都係做住改,改住做;另外就係套系統個收發距離同角度問題,當時開咗鋪短短半年,套系統已經出到第3代,由最早期只可對應前方90度,10~100公尺呢個範圍,誤差少於8mm,提升到前方170度,1~400公呎,誤差少於3mm,即差唔多等於個發射器厚度,現時發展到2019年推出嘅第9代,已經可以為到接收器360度嘅800公呎範圍內,準確咁維持少於3mm嘅誤差,而對焦目標亦由最初3個,大幅提升到理論值255個,對焦時間差控制於唔到1微秒內完成,基本上現實部署呢套對焦系統後,對焦速度個瓶頸係喺返個鏡頭上.

之後隨住物聯網慢慢成熟,老公上2年就推咗個專用喺酒店同服務式住宅嘅跨聯網定位系統,將唔同制式嘅定位系統結合,除咗用返本身套對焦系統改裝做短距離定位外,配合LoRa,NB-IoT物聯網做中程定位,加上iOS同Android用戶端遠程定位,全面掌握住客同租戶嘅位置,幫好多客做能源管理,照明,冷暖氣,熱水同埋樓宇監控系統.

不過呢套系統,係真係向難度挑戰,除咗真真正正,面對比較大嘅企業傾生意之外,無論客戶嘅要求,相關認證,系統保安等等,通通相對之前套對焦系統,係需要投入同部署龐大嘅資源,2018年整整一年,呢套系統嘅研發開支,就蠶食咗對焦系統帶嚟嘅營收,好在最後因為2019年物聯網成熟度越嚟越高,由晶片到唔同嘅物聯網制式,相對之前係穩定咗好多,呢套系統都叫開始為營收作出貢獻...